《2022稅務(修訂)(關於住宅租金稅項扣除)條例草案》二讀發言

主席，西方有句名言Nothing is certain but death and taxes，意思係世事無常，唯有死亡同交稅是無可避免。不過, 避唔到，有得減都係好嘅。今次立法會審議嘅政府稅務修訂條例草案，就係建議俾無殼同無辦法上車嘅租樓族，由佢哋支付嘅租金限定數額，取得稅項扣減。對此，我原則上係支持嘅，但亦想指出，有關扣減上限實在太少，希望政府可以加大寬免金額，多啲照顧中產一族。

過去我一直指出，既然供樓一族,可以將供樓利息嘅開支作為扣稅一部分，點解未能置業嘅租樓人士又無稅務減免呢? 所以我多年來一直都提出相關要求，等到今年，終於有望見到無擁有物業而要租樓自住嘅人士，都可以將住宅的租金開支，用作扣減免稅額，上限係10萬蚊。

主席，每年10萬上限，即每月唔夠9千蚊嘅租金，以香港現時的租金水平，又可以租住什麼的單位呢？若以個人入息課稅最低兩個稅階共10萬元嘅稅率，平均4%計算，每月只可減稅少過340元，又可以幫到幾多呢？不過政府指出，同供樓利息免稅不同，有關免稅沒有設期限，只要合資格，可以無限期申領。而兩者上限同樣係10萬蚊，對市民嚟講，都係有好過無啦。

主席，對於今次修訂，有指分開租用泊車處或繳付管理費嘅租客，未能容許將相關支付金額扣稅，構成歧視，政府當局解釋，一啲「全包」嘅租金，已包括泊車位同管理服務費等，如果要將哩啲款項從繳付住宅租金分開，即使並非不可能，亦極為困難，而且稅務局要核實相關嘅款項時，所涉及嘅行政程序亦相當繁複，而且估計涉及不少額外資源，可能人手又要增加。對此，我係支持同認同政府嘅，唔值得花呢啲資源去分拆出嚟。

不過，有一點我希望政府要注意，雖然政府當局認為，多過1名聯名租住一個住宅單位租客响租賃市場唔常見，只佔住宅租賃總額0.3%。為求簡化、方便行政及避免糾紛，哩類租約租客各自所付嘅租金不論係咪一樣，都會平均計算，用作申請租金扣稅，哩啲無親戚關係嘅共租人士，可能會因應佢哋使用單位不同房間大小，所負擔租金亦不一樣，點解唔容許佢哋達成協議分配扣稅額呢? 哩個做法應該唔複雜，亦唔會額外增加大量嘅行政費同工作，點解政府又唔接納呢?

按政府現時嘅建議，為咗爭取更多嘅扣稅額，估計聯名租約嘅租客，可能會要求業主分開為佢哋每個人納一份租約，咁做，每位租客仲有機會攞盡10萬蚊嘅扣稅上限，吸引更多分租客咁做，導致分開租約增加，政府每年嘅稅收可能會減少。

主席，根據政府估計，因為有關住宅租金稅項扣除條例建議，估計每年稅收減少33億，但係租樓一族不但因而可以減輕少少負擔，亦會感到政府冇忽視咗佢哋，呢個做法亦較為公道，產生嘅社會效期，包括經濟方面，估計不比33億為少。希望政府能在可見嘅將來，檢討建議的免稅上限10萬蚊，為租樓自住一族，增加減稅額，緩解佢哋嘅稅務壓力。

主席，本人僅此陳詞，支持條例草案。