「提升公共交通服務表現」議案

主席，提升公共交通服務表現，相信大家都會支持；推動香港與內地鐵路系統融合，亦係一早就應該咁做。因此我嚟緊嘅發言，會集中討論易志明議員提出嘅修正案。

易議員嘅修正案提到，香港嘅公共交通系統獲評為世界第一。雖然我同唔少市民，對香港嘅公共交通服務時有批評，但每當大家去到外國，乘坐佢哋地鐵同巴士，都會感到其實香港嘅服務水平都係相當高嘅，包括班次準、密度高、設施新、舒適度同清潔度亦相當唔錯，唔會周不時因罷工等問題而暫停服務。當然我哋唔應該自滿，應繼續提升、優化。

有別於其他大部分地區，香港嘅各類公交服務都係以商業方式營運。相關營辦商為咗吸引多啲乘客同收入，有動力不斷改善服務。但同樣因為在商言商，當面對營運成本上升，尤其係燃料費上漲，因司機及維修人員不足而要加薪留人，乘客量因各種因素、包括疫情同政府嘅政策有所減少，令到幾乎所有非鐵路嘅公交服務，近年都喺經營上出現較大幅虧蝕。喺商業運作原則下，自然就要申請加價，部分嘅建議加幅仲相當驚人。如果完全唔畀佢哋加，部分嘅營辦商有可能會做唔住。

就此，有部分議員同市民要求政府提供補貼，以降低巴士、渡輪等嘅票價加幅，但其實政府現已通過交通費補貼計劃、長者兩蚊乘車優惠等，每年用緊數以十億元嘅公帑，直接或間接咁資助不同公交機構向市民提供服務。政府係咪仲有能力、無止境咁增加補貼呢？

此外，當政府嘅補貼比例不斷增加，會唔會削弱咗香港公交服務以商業方式營運嘅特色同優勢，令到營辦商逐漸失去維持高質量服務嘅動力呢？易議員嘅修正案強調，要檢討公共交通嘅票價調整機制，確保公交服務營辦商喺財務可行嘅情況下繼續營運，從而滿足監察要求，我認為正正係點出咗問題嘅核心。

另外，有人提議以政府收取到嘅港鐵股息，補貼非鐵路公交服務。其實港鐵嘅業務收益表現優於其他公交企業，主要係靠物業發展等非票務收益補貼，即所謂嘅「以地養鐵」。我好早就提出，一啲新發展區嘅大型公共交通交匯處，其實同港鐵站一樣，上蓋可以用嚟發展，起商場以至往宅。係咪可以用類似「以地養鐵」嘅模式，利用相關物業發展嘅收益嚟成立基金，用以補貼巴士、小巴嘅票價，以降低佢哋嘅加價幅度呢？一啲渡輪碼頭用地，除咗賣下啲小食，係咪可以經營更多不同類型嘅業務呢？

另一個日趨嚴重嘅，係運輸業人手不足問題，不但影響服務質素，亦間接導致營辦商嘅收入減少。除咗採取適切措施吸引更多年青人入行，業界亦已提出不同嘅輸入勞工方案，希望政府同各黨派議員都實事求是，認真、客觀咁考慮，唔好一味反對，一味要求以公帑補貼。本人謹此陳詞。