「加強推動樂齡科技，提升銀髮族生活質素，應對人口高齡化」議案

主席，我一直關注香港嘅「雙老化」問題，對於樓宇老化，我同業界過去提出過唔少建議，唔少都獲得採納，政府多年來推出咗唔少法規、政策同資助計劃，例如強制驗樓、驗窗，資助業主換渠、換升降機、提升消防設施等等。

對於人口老化，我喺過去兩屆立法會任期亦提過唔少建議，包括早喺疫情爆發同移民潮出現前，我已警告香港將出現日益嚴重嘅少子化、新移民減少同勞動力短缺問題，要求政府制訂全面嘅人口政策同應對人口老化嘅行動策略，但相關官員一直唔肯正視，到今屆政府先嚟做已經遲咗。

原議案促請政府加強推動樂齡科技，我係相當支持嘅，但我喺我嘅修正案提出，仲要喺樓宇設計同城市規劃方面作出配合，咁先可以有效提升銀髮族嘅生活質素。例如馬逢國議員提出嘅修正案，提到外骨骼同電動輪椅設施，如果個單位設計嘅門同走廊太窄，連輪椅都過唔到，就得物而無所用。

我早喺2015年，就聯同多位跨界別嘅專家進行調研，發表咗名為「如何促使私人房屋發展提供長者適切居所及相關配套」嘅建議書，推動有助居家安老同長幼共融嘅建築設計。但由於相關建議涉及多達6個政策局，人人有份，就變成冇人跟進。

主席，早前接連發生多宗獨居長者同雙老長者，喺家中去世咗一段時間，先至畀人發現嘅都市悲劇，其中一個個案更係化咗骨先至有人知。呢種現象係外國有個專有名詞，叫做「孤獨死」，最初喺日本出現，其後多個歐洲國家、以至最近喺南韓都引起關注。有關國家同地區嘅共通點，係人口老化及少子化嚴重，離婚率上升同鄰里關係疏離等，全部特徵都可以喺香港搵到。香港近年仲出現咗因移民潮而衍生嘅所謂「棄老潮」，令獨居及雙老長者問題雪上加霜。

日本、英國同南韓政府，已先後就「孤獨死」問題提出針對性嘅政策措施，委派專人去處理。特區政府就似乎連承認、正視有關問題都未做到，過往嘅安老政策同資助計劃，都係偏重醫療同院舍服務，忽略咗日常保健同居家安老，更談不上提升長者嘅心靈健康。

原議案同修正案提到，要善用人工智能同網絡科技，以加強監察獨居長者嘅身體狀況，同協助佢哋建立社交網絡，呢啲都係重要嘅，但都不能完全取代人與人之間嘅接觸。要協助長者走出家門，走進社區，除咗自己個單位，喺道路設計，公共空間同公交服務嘅規劃設計等，都要作出相應配合。

過去我哋集中要求無障礙設施，主要只係加裝斜台同扶手，做唔到真正促進、鼓勵長者出行。我哋唔止要着重長者嘅身體健康，仲要讓佢哋享有友善嘅居住環境設計，注重心靈健康，整體提升長者嘅生活質素。本人謹此陳詞，支持原議案同各項修正案。