20241127「推動高質量發展，建設金融強國」議案

主席，我發言支持G19成員、代表金融服務界嘅李惟宏議員提出嘅「推動高質量發展，建設金融強國」議案。而8 項修正案之中，有3項都係由G19議員提出，包括簡慧敏、譚岳衡，以及陳振英議員，佢哋本身都係從事金融行業，反映G19對於鞏固、提升香港作為國際金融中心地位，以至協助國家發展成金融強國嘅重視。

我本身唔算好熟悉金融業務，但係我好早就指出，香港一方面要推動經濟多元化發展，包括創新科技、旅遊、文化及體育產業等等；但係喺另一方面，我哋亦唔好忽略咗香港嘅傳統優勢產業，尤其係金融業，需要不斷咁優化同革新，包括協助更多香港同內地嘅企業融資、集資、及投資，做大強做，走向世界；促進海外嘅企業嚟到香港同內地發展，互惠共贏。

香港金融業發展面對嘅挑戰同改革嘅方向，其一係同我哋發展、建造業界都係一樣，需要提速，提效，提量，提質；要大力簡化同加快各類法定及行政審批程序，從而降低交易與合規成本，提升競爭力同鼓勵創新。

其二係面對以美國為首嘅西方反華勢力打壓，除咗繼續加強與美歐國家嘅聯繫溝通，香港需要進一步拓展金融開放合作，尤其係與我國友好嘅國家，包括東盟、中東地區及其他「一帶一路」市場。

其三係因應內地對各類專業金融服務嘅需求增加，以及人民幣逐步走向國際化，香港金融業必須更好地對接國家嘅發展策略。呢3點正係國務院何立峰副總理，日前對香港金融業提出嘅3點希望。

至於政府同業界具體應該點樣做，我無謂班門弄斧，留番畀呢方面嘅專家，包括G19嘅同事去闡述。嚟緊我想集中講下原議案及其中一項修正案提到嘅「養老金融」。

主席，我喺施政報告辯論中都提過，香港部分長者其實擁有一定資產，包括物業、銀行存款、有儲蓄成份嘅保單等，但由於唔似後生時有固定嘅收入，導致佢哋不必要地過份慳儉，甚少外出消費。咁樣唔單止影響消費市場，對長者嘅生活質素同身心健康都冇好處，可能會間接增加咗政府嘅醫療及社福開支。

若果能夠發展好「養老金融」，包括譚岳衡議員喺今早口頭質詢提到嘅「退休三寶」，即係香港年金計劃、安老按揭計劃，以及保單逆按計劃，讓長者喺退休後仍每月取得一定穩定收入，對佢哋嘅晚年生活，以及維持整體經濟動力相信都有幫助。

對於鄧家彪議員建議，推動強積金基金，提供保證回報高於通脹嘅基金選項，我都係好想嘅，但係咪做得到、同點樣做呢？會唔會最後又要政府包底，甚至變成另類嘅全民退休保障呢？香港過去嘅成功，係喺社會福利、政府稅收、營商環境，以及整體競爭力之間取得平衡，呢個平衡需要好小心去維持。本人謹此陳詞。