《商業租戶短期保護措施(2019年冠狀病毒疫情)條例草案》修正案發言

主席，以下係我對「暫緩追租法案」各項修正案嘅發言，先講由財政司司長動議嘅修正案。草案訂明只有被列入附表內嘅行業處所，先至受到今次立法保護。當中包括因防疫規例而被禁營運嘅行業，例如戲院、美容院、健身室等，以及多個雖然可以繼續營運，但因為疫情及社交距離限制，而導致生意大跌嘅行業，例如係之前被禁晚市堂食嘅飲食業。

司長嘅修正案，主要係將一啲冇提供堂食服務，但同樣受到疫情打擊嘅飲食業處所，包括外賣店、麵包店、中央廚房同食物製造廠等，都納入草案嘅保障範圍，係從善如流、補漏拾遺嘅做法，對此我係支持嘅。

龍漢標議員嘅修正案分為兩部分。第一部分係收窄草案嘅保障範圍，改為只係保護中小型企業，而修正案建議嘅中小企定義，係剔除咗所有上市公司及相關嘅子公司。須知草案其中一個主要嘅目標，係協助所有深受疫情打擊嘅商戶，包括食肆同零售店舖，而香港亦都有唔少嘅食肆同零售店舖，都係由上市公司或其子公司所經營嘅。

此外，由於今次立法只係暫緩業主追租，而並非豁免租客交租，對於一啲財力雄厚嘅上市公司或子公司，以及一啲冇受到疫情嚴重影響、甚至可能因疫情而多咗生意做嘅大企業，佢哋最終「走租」嘅機會相信係非常、非常之低，亦唔會刻意去拖延交租。

龍議員第二部分嘅修正案，係將受到草案保障嘅物業租期，由原定嘅今年1月1日起計，延後至由法案刊憲生效起計。須知第五波疫情係喺今年1月初爆發，相關嘅加辣防疫措施，包括晚市禁堂食令、二人限聚令等等，都係喺1月初起陸續實施。將「保護期」延後，我認為會令立法嘅效用大打折扣。

對於龍議員關注嘅追溯力同私有產權問題，可能有人會提出司法覆核等，政府亦都多次作出解釋，草案嘅寫法亦已參考咗其他普通法地區嘅類似立法。

主席，鑒於龍漢標議員嘅修正案，將會大大削弱草案嘅保障範圍同效力，同時喺預防濫用方面嘅作用亦都有限，因此我唔會支持。正如我喺二讀辯論時指出，希望隨着第五波疫情減退，防疫措施放寬，經濟逐步恢復，欠租情況會逐漸減少，條例嘅實際應用需要亦將大大減低。主席，本人謹此陳詞。