[:zh]《2019年撥款條例草案》(2019至2020年度財政預算案)二讀發言[:]

[:zh]主席，首先我想整體回應今年預算案嘅開支及收入建議，以及我對現屆政府嘅理財哲學同思維嘅睇法。

有民調顯示，市民對今年預算案嘅評分偏低，一般解讀係因為今年預算案派糖少咗、細粒咗，例如薪俸稅寛免上限由去年嘅3萬元減至2萬元，綜援及生果金「出三糧」變為「出雙糧」，因此難以贏得市民嘅掌聲。

同一時間，亦有唔少專家學者對政府整體開支，尤其係一次性舒緩措施近年不斷上升表達關注。如果扣除分階段回撥嘅824億元房屋儲備金，未來4年嘅政府經營帳目將連續4年錄得赤字，綜合帳目亦有3年「見紅」，令人質疑是否有違《基本法》第107條規定嘅「量入為出」原則。

正如陳茂波司長指出，喺現今世界嘅經濟及政治環境下，特區政府有必要喺公共理財方面更加積極有為，先至能夠有效促進經濟發展同回應市民訴求，呢個大原則我係支持嘅。事實上，不少社會人士，包括本會嘅不少議員，都批評上幾屆政府同財政司司長係「守財奴」，未能真正做到「應使則使」，多年來不必要咁累積巨額盈餘同儲備。

今年預算案喺盈餘減少下，仍然提出喺未來幾年投放約1,500億元新資源推動經濟、改善民生。喺基建投資方面，政府未來4年嘅基建及工務工程開支平均每年超過1,000億元。近年用於發展創新科技嘅投資承擔及稅務優惠，累計亦已超過1,000億元。喺回應市民訴求方面，雖然今年預算案相對冇上年咁「甜」，但新推出嘅「派糖」措施仍有386億元，兼顧咗發展與民生所需。

政府一方面要加大投資、促進經濟發展，另一方面又要關顧弱勢社群、應對人口老化等挑戰，錢從何來呢? 點樣可以做到長遠收支平衡、不違背「量入為出」原則呢? 我認為答案仍然係要進一步加大投資及促進經濟發展。

回顧香港過去數十年嘅經濟發展，每次香港出現經濟或財政危機，都並非由於政府大幅度增開支所致，而係因為全球或內地政經局勢出現急速變化，香港經濟未能及時轉型及搵到新嘅增長點。每當香港加大投資力度及加快經濟轉型，令市民同企業嘅發展機遇及收入增加，各類政府收入亦自然會回升。

政府喺去年施政報告提出「明日大嶼願景」，一方面係要幫助解決嚴峻嘅土地及房屋供應短缺問題，另一方面亦希望為香港經濟注入新動力、尋找新嘅增長點。對於有人擔心相關填海及基建工程會花光香港嘅儲備，大家可以重溫一下喺臨回歸前推出嘅玫瑰園計劃。

記得當年亦有不少人質疑玫瑰園計劃嘅需要性同財務可行性，擔心會掏空庫房，令香港「車毁人亡」。結果係點呢? 玫瑰園計劃非但為香港喺回歸後嘅經濟持續發展奠定良好基礎，因相關填海工程及搬遷舊機場而產生嘅西九龍填海區同前啟德機場用地，為市民提供咗大量公私營房屋單位，亦為庫房帶嚟咗可觀嘅收入。

歷史與事實證明，玫瑰園計劃對香港經濟、民生、以至公共財政都係有利嘅，我相信「明日大嶼」亦都一樣。

主席，我當然明白要解決香港嘅土地房屋問題，唔可以單靠「明日大嶼願景」，必須多管齊下覓地建屋，尤其係對於住緊喺劏房等惡劣居住環境嘅基層家庭。

今年預算案預留咗20億元，支持非政府機構興建過渡性房屋，係一個好嘅開始，但仍然遠遠唔足夠，點解政府自己唔做呢? 面對現時公屋輪候時間不斷延長，咁多市民被迫交貴租住劏房，點解政府唔重推當年嘅臨時房屋，提供快捷、到位嘅緩解措施呢? 會唔會係政府覺得，喺臨屋政策廢除咁多年後推動，好似好羞家、好肉酸咁呢? 但政府唔應該因為面子問題而奉行鴕鳥政策，埋首沙堆，逃避解決市民短期、急切住屋需要嘅責任。

政府喺去年預算案撥款10億元，資助非政府機構善用空置政府用地及空置政府物業，包括用作興建過渡性房屋，但唔少有興趣團體都反映，大部分可供佢哋租用嘅官地及物業，都係位置遍遠、缺乏配套嘅「賣剩蔗」，質疑政府霸住晒啲靚地又遲遲唔發展。

喺上個禮拜嘅特別財委會會議，我就點出咗多個政府部門嘅「生人霸死地」例子，除咗早已為人詬病嘅空置校舍，仲有合資格入住人數不斷減少嘅高級公務員宿舍、多個已經或即將關閉嘅公眾街市、以及多幅丟空曬太陽多年嘅已修復堆填區用地。

雖然上述物業或用地未必全部適合作居住用途，但可以考慮改作社區或其他用途，咁至係地盡其用。例如鄰近市區、交通方便嘅空置街市，係咪可以租畀社福機構使用呢? 咁政府就唔使大量公帑向私人市場購入咁多「死場」。

我相信大部分政府部門都並非特登霸住啲地而唔發展、唔肯同其他部門合作分享，佢哋可能都係受制於政府內部嘅僵化制度及條例。希望所有部門對土地問題都肉緊啲，身兼土地供應督導委員會主席嘅財爺更加要睇緊啲，唔好令市民覺得政府喺處理空置官地同物業時「嘆慢板」。

主席，跟住我想簡短講下交通運輸、智慧城市建設、青年及中小企機遇同公務員問題。香港嘅運輸政策係以公共交通為本，公共交通政策係向鐵路集體運輸傾斜，而香港嘅鐵路服務係由港鐵公司壟斷，因此一旦港鐵出咗問題，香港嘅整體公共運輸政策都會出問題。

負責調查沙中線工程問題嘅獨立調查委員會早前發表中期報告，對港鐵及政府嘅工程監管制度提出多項改善建議，時間關係我唔再詳述嘞。不過我注意到最近有報道講番，政府曾於2014年提議香港興建多7個新鐵路項目，而港鐵已於去年中向政府提交其中5個項目嘅建議書。

我希望政府喺決定是否及何時推展有關項目時，必須審慎評估港鐵係咪「頂得順」、「哽得落」，唔好重蹈之前要港鐵喺同一時間興建多條新鐵路嘅教訓。沙中線嘅工程質量與紀錄不全問題，或多或少都與港鐵嘅承受能力有關，當整體工程因種種理由出現超支及延誤，港鐵、承建商及相關顧問公司因應各方壓力，被迫喺不增加資源下趕工追回進度，最後可能就會喺程序上、甚至質量上作出犧牲。

智慧城市方面，我喺特別財委會都講過，無論係提供政府場地租用及公共交通嘅實時到站資訊、定係智慧燈柱建設，以至簡單如部門更換電腦軟硬件，都有一個共通點，就係慢！起動九龍東計劃，係喺特首林鄭擔任發展局局長時提出嘅，九龍東智慧城市建設至今仍只聞樓梯響，到依家連一條智慧燈柱都未起好。

政府要求對發展商快啲將住宅落成、快啲推出市場賣樓，否則就要徵收空置稅，但自己卻喺研究、規劃同審批方面嘆慢板，真係令到唔少市民及私營業界人士好氣憤，覺得政府嚴人寬己、雙重標準、好唔公道。

新嘅政府採購政策已於本月初推出，將審核標書嘅價格評分比重下調，技術評分則提高，以鼓勵創新及科技應用，並非只求價低者得。呢個做法我同業界都係歡迎嘅，但要進一步增加中小企同青年專業人士嘅參與機會，單單改變評分制度並不足夠，最重要係避免綑綁式招標，盡量唔好將工程項目嘅設計、建造及營運都批畀同一間公司，以及喺可行情況下做到「本地優先」。

預算案分別預留咗60億及6億元，發展新嘅海濱長廊同翻新240所公廁，我希望政府盡量將有關工程及顧問合約拆細，唔好一兩份合同做晒所有嘢，否則只有大公司、大企業有能力入標。最好係揀選部分項目舉行公開設計比賽，畀我哋啲年輕人同專業人士發揮創意，一同參與香港嘅社區建設。

最後係公務員問題，我要感謝財爺回應咗我同我界別內嘅公務員訴求，喺去年同今年嘅預算案增加咗多個建測規園部門嘅人手。不過對於個別嘅專業職系同職級，尤其係首長級職位方面，應該開設常額定係編外職位、某啲職位係咪應改為跨專業讓有能者居之，政府仲有檢討同改善空間，以進一步善用不同界別嘅專才。

仲有係部門人手加咗之後，相關嘅辦公室面積、設施、共享空間等，好似並冇跟得咁貼，未有適時增加，影響公務員嘅工作環境同效率。有關問題涉及各部門協調，希望政府喺行政方面配合。此外，提供畀公務員嘅進修課程、考察機會、以及相關嘅培訓假期又係咪足夠呢? 希望公務員事務局繼續努力，為公務員爭取多啲資源，希望財爺亦會喺財政上配合。

主席，本人僅此陳詞，支持《2019年撥款條例草案》二讀。[:]