[:zh]《2019年稅務(修訂)(稅務寬免)條例草案》二讀發言[:]

[:zh]主席，今日我哋討論嘅《2019年稅務(修訂)(稅務寬免)條例草案》，目的係落實2019至2020年度財政預算案建議嘅稅務寬減措施，寬免2018至2019課稅年度75%嘅薪俸稅、個人入息課稅及利得稅，每宗個案以2萬元為上限。政府當時預計有關措施可惠及約191萬名打工仔同個人營業者，以及14.5萬個需要繳稅嘅公司同法團。有關寬免估計會令政府收入合共減少約189億元，當中170億元為薪俸稅及個人入息課稅，19億元為公司利得稅。

草案原定喺今年六月尾至七月初恢復二讀，但由於修例風波引發嘅連串大型遊行示威，及其後演變成為多次違法暴力衝突，尤其係七月一日晚至七月二日凌晨發生嘅違法暴力衝擊立法會事件，導致立法會大樓遭受嚴重破壞，議會運作陷入癱瘓，令呢條草案被迫押後到今日先可以重新處理。

喺過去呢四個多月，激進蒙面示威者使用嘅違法暴力行為不斷升級，包括堵塞香港國際機場、阻礙、甚至毆打使用機場嘅市民同旅客、大肆破壞港鐵設施、四處緃火同掟汽油彈、恐嚇、搗亂、以至焚燒商舖、當街圍毆不同意見人士、甚至係意圖殺害警務人員同針對佢哋嘅家人，到最近更仿傚極端恐怖份子嘅遙控炸彈同無人機都出埋，導致多個海外國家及地區向香港發出旅遊警示，多個國際評級機構調低香港嘅信貸評級，本港居民嘅言論、出行自由及消費意欲亦大受影響。

上述情況令到香港嘅各行各業，尤其係旅遊、零售、餐飲、運輸及建造等行業嘅經營者同從業員，生計嚴重受損，再加上中美貿易戰、英國硬脫歐陰霾等外圍因素嘅多重打擊，唔少中小企都面臨倒閉，數以十萬計打工仔面對減薪、裁員或開工不足嘅情況。

喺咁嘅非常時期、非常環境之下，財政司司長於八月中宣布推出一系列加碼紓困措施，包括透過修訂呢條草案，將原定嘅75%稅務寬免百分比調高至100%，絕對係適時同有必要嘅。

有關措施預計可惠及143萬名納稅人同企業，讓佢哋額外節省總共18億4千萬元稅款。可惜嘅係，政府並未有一併調整有關稅務寬免嘅金額上限，即係依然維持每位納稅人同企業，最多只能退稅2萬元。假設冇其他額外免稅額，打工仔只要月入多於約3.3萬元，就唔能夠因為今次加碼退稅而受惠，令到唔少中產市民，包括唔少專業人士，感到非常失望同不公道。

政府喺今年預算案決定將退稅上限由去年嘅3萬元縮減為2萬元，我最初係表示理解嘅，因為上個財政年度政府錄得嘅綜合盈餘只有680億元，相對於2017至2018年度錄得嘅1,489億元盈餘，大幅減少超過五成，今年嘅稅務寬免措施適度「減甜」，本來係無可厚非。但係喺現時咁惡劣嘅經濟環境下，政府嘅加碼措施理應係一視同仁，惠及各個階層，但依家嘅做法就再次予人只幫基層，漠視中產困難嘅感覺。

事實上，唔少中產家庭、專業人士同中小企業，都一直覺得政府嘅「派糖」及紓困措施對佢哋唔公平、唔公道。佢哋覺得自己每年向庫房繳納數以萬元計、甚至更多嘅稅款，但絕大部分房屋及社會福利都冇佢哋份。

中產市民嘅收入相對基層雖然比較高，但開支亦唔少，尤其係住屋開支。佢哋冇資格申請公屋或居屋，大部分都要租住或購買私樓，租金及供樓支出非常高昂。對於被迫住喺納米樓嘅中產家庭，佢哋嘅人均居住面積隨時仲細過部分公屋租戶。

特首喺上周發表嘅新一年度施政報告，宣布就「恆常現金津貼計劃」展開研究，希望紓緩部分非公屋、非綜援低收入人士嘅租金負擔，即係變相將以往透過關愛基金發放嘅「N無」人士租金津貼恆常化。但係對於嗰啲冇自置物業、冇攞過社會福利、冇資格申請公屋及其他資助房屋計劃嘅「N無」中產家庭，佢哋嘅租金支出同生活壓力都好大，政府卻好似從來冇諗過向佢哋伸出援手。

我喺去年提交畀財爺嘅財政預算案建議書，以及今年提交畀特首嘅施政報告建議書，都有要求政府增設租金開支免稅額，以紓緩中產階層嘅租金負擔，政府都冇採納到。我希望財爺喺制訂來年度預算案時，會以「破格」嘅思維，從促進社會和諧、減少階級矛盾嘅角度，去考慮我嘅有關建議。

中產家庭嘅另一項主要支出，就係子女嘅教育開支。近年政府推出咗唔少加強支援學校同資助學生嘅措施，但係大部分都係針對基層學童，對中產幫助極微。

今年施政報告提出向每位中小學及幼稚園學童，每年發放2千5百元學習津貼，雖然中產階層終於都有份，但我都希望政府會繼續考慮我早前提出，設立實報實銷嘅子女教育開支免稅額嘅建議，每名子女上限5萬元，藉此鼓勵家長投放更多資源讓子女接受優質教育，同時減輕佢哋嘅沉重稅務負擔。

主席，我要再三強調嘅係，中產市民其實並唔係伸手要求福利，只係想政府做得公道啲，希望唔使交咁多稅，尤其係喺依家嘅咁嘅經濟環境。今年預算案嘅其中一項措施，就係將現時隷屬財經事務及庫務局嘅稅務政策組，轉移至直屬財政司司長辦公室，以協助司長檢討香港嘅稅制同制訂每年預算案嘅稅務建議。我希望司長喺增加咗資源同人手之後，會重新審視我同其他議員提出嘅相關建議，加強對中產及專業人士嘅支援。

主席，最後我想講下政府嘅財政狀況。我喺幾個月前寫咗一篇文章，指出政府多項經常性開支近年不斷增加，一旦經濟逆轉，政府收入大減，就可能會出現頗為嚴重嘅財政赤字。有關情況不幸畀我言中，受到外圍經濟同內在因素雙重打擊，香港經濟已經出現技術性衰退，政府各項稅收都肯定會受影響。

早兩日我上地政總署網頁睇過，本財政年度已過咗超過六個月，賣地及各類補地價收入合計只有約480億元，按此推算全年嘅總地價收入將不足1千億元，較預算嘅1,430億元，可能會大減超過500億元甚至更多。

政府原本估計本年度只會錄得百多億元盈餘，但單單計算地價收入呢筆數，好可能已令到政府轉盈為虧。再加上因失業或出現虧蝕而申請遲交薪俸稅及利得稅嘅個案，股市及樓市成交下跌對印花稅嘅影響，以及為咗應對經濟逆轉而推出嘅一系統額外紓困措施，政府本年度隨時會錄得以百億元計嘅財赤。

幸好香港嘅底子厚，政府坐擁超過一萬一千億元嘅財政儲備，只要香港能夠盡快止暴治亂，社會同經濟回復正常運作，一兩年嘅赤字並唔會造成太大嘅長遠財政影響。我特別提醒政府要汲取當年亞洲金融風暴至沙士時期嘅教訓，唔好因為稅收減少，出現財赤，就馬上改為實施緊縮開支政策，令香港經濟及社會民生進一步受挫。

高中經濟學都有教，當經濟唔好，私人消費及企業投資收縮嘅時候，政府就更加應該加大公共開支額度，刺激內需，咁先可以做到財爺提出嘅「撐企業、保就業、穩經濟」口號。尤其係屬於非經常性嘅工務工程開支，絕對不應減少同減慢，希望局長及司長留意。

當然後我好明白呢個係需要立法會配合嘅，財委會批唔到錢，政府想加快「開水喉」都開唔到。因此我懇請各黨派、反對派議員，不論你哋對當前嘅政治問題、暴力問題、誰對誰錯等，有乜嘢立場同睇法，都唔好犧牲我哋全港三十多萬建造業從業者，以至各行各業打工仔同中小企嘅利益，唔好再喺財委會及其他立法會委員會拉布，盡快有序、有效率咁審議同表決各項有利經濟民生嘅項目同工程撥款。

本人僅此陳詞，支持草案二讀。
[:]