[:zh]《2020年印花稅(修訂)條例草案》二讀發言[:]

[:zh]主席，政府喺2013年2月就工商舖物業實施徵收雙倍印花稅，即俗稱「辣招」，以遏抑市場炒風。隨著黑暴事件、疫情持續，加上美國打壓三重打擊下，工商舖物業無論喺租金、成交價，以至交投量，均喺去年開始大幅下跌，特首喺去年發表嘅《施政報告》，因應市場嘅改變，宣布撤銷非住宅物業嘅雙倍從價印花稅，並於公布翌日(11月26日)生效。

政府當時指出，因應當前嘅經濟環境，非住宅物業已睇唔到有市場過熱、交投暢旺及價格飆升嘅情況。為咗喺經濟下行時，促進企業嘅資金周轉，政府因此把對某啲處理非住宅物業嘅文書可予徵收嘅從價印花稅，恢復到2013年2月23日之前適用嘅第2標準稅率。

無疑，限聚令及內地自由行減少，加上禁堂食嘅措施，令食肆同零售業嘅生意一落千丈，市場不時有要求業主減租嘅聲音，連有啲連鎖名店都欠租，經營困難，導致唔少傳統老店亦要結業，旺區鬧市吉舖處處湧現，故此「撤辣」對工商舖市場係有正面嘅作用。事實亦係咁，商舖喺減辣之後，成交多咗，售價指數下跌嘅趨勢亦有所放緩，所以我係會支持有關印花稅(修訂)條例草案通過。

今次「撤辣」有助面對財政壓力嘅商舖業主，有利佢哋出售物業套現，但係我覺得減辣措施係咪適用喺同樣被歸類為非住宅物業嘅車位市場呢? 因為近期車位嘅成交價未有顯著下跌，反而有唔少高價成交，例如何文田一個豪宅屋苑嘅車位，過去數月每宗賣價都成550萬，有一個仲賣成650萬，創咗全港住宅車位嘅第二高價。

我哋都知道，車位入場嘅門檻可高可低，減辣令車位嘅買賣增多，價值200萬元以下嘅車位，釐印費只係100元，買賣成本低咗，會唔會吸引更多嘅短期炒賣呢? 有車位喺短短一個月轉手，帳面就賺咗10萬。仲有投資者接受傳媒訪問，話自己係過去六七年，買賣車位700次，賺咗成千萬。所以我希望政府都正視吓，喺減辣之後會否助長車位嘅炒賣。

另外，我注意到豪宅近月亦一再有高價成交，早前半山波老道一個豪宅新盤，單位成交價係超過12萬一平方米呎，攞咗個第一，做咗亞洲樓王，其他成交亦屢創新高。

因此，本人向政府提交2021/2022年度預算案建議書，就強調唑現時經濟環境，政府赤字高企時，應採取「能者多付」嘅原則增加稅收，對豪宅市場徵收較高嘅物業交易印花稅。如果成交價超過5,000萬、甚至1億以上嘅「超豪宅」係咪可以徵收高啲印花稅呢? 一來可以增加庫房收入，同時亦可以發揮財富再分配嘅效果。

其實，售價超過5,000萬及1億元嘅豪宅買賣，多收2%至4%嘅印花稅都唔係太多，以波老道「亞洲樓王」單位為例，一單交易就可以為庫房帶來1,800 萬元額外稅收，呢筆錢可以幫到好多人，但對啲富豪嚟講只係九牛一毛。對於啲平嘅、上車盤，就可以收少啲稅，希望政府可以認真考慮我嘅建議。

主席，我謹此陳辭！[:]