[:zh]《2021年不停車繳費(雜項修訂)條例草案》二讀發言[:]

[:zh]主席，我發言係支持通過《2021年不停車繳費(雜項修訂)條例草案》。本屆政府提出將香港建設成一個世界級嘅智慧城市，並且喺去年底公布《香港智慧城市藍圖 2.0》，今次草案推行嘅不停車繳費系統，就係「智慧出行」嘅措施之一，預計由明年起，分階段喺各條政府收費隧道實施。

喺返工放工繁忙時段，本港多條隧道出現均塞車嘅情況，相信對每個香港人都唔會感到陌生。一項喺2018年進行嘅研究指出，塞車問題最嚴重嘅紅磡海底隧道，喺繁忙時段嘅容車量，已較原本設計超出77%，平均需要30分鐘先過到海；排第二嘅大老山隧道，繁忙時段南行往九龍亦平均要用26分鐘，相信最新數據塞車情況應該是有增無減。市民每日因為塞車而浪費咗大量時間，影響生活質素同整體生產力。

通過不停車以自動化方式繳付隧道費，取代現時人手收費模式，車輛唔需要再停低排隊畀錢，某程序可以減少塞車問題同廢氣排放，而移除收費亭更有助騰出空間，改善隧道出入口交通，對駕駛人士、對乘客，以至廣大市民都有利。

主席，電子方式繳費係全球大趨勢，而不停車繳費亦唔係乜嘢高新科技，依家啲隧道都用緊嘅「快易通」系統，都係使用類相技術，駕駛者已有一定認識。內地亦喺2019年嘅全國人大會議通過，目標喺兩年內基本取消全國嘅高速公路省界收費站，改行自動化收費系統。

因此，特區政府提出嘅落實時間表，能否再壓縮、再加快去做呢？因應不停車繳費新系統會分階段實施，如果時間拖得太長，香港嘅隧道會同時有停車繳費、「快易通」同全新嘅不停收車收費系統，三種收費模式，可能對車輛使用收費隧道造成一定混亂，希望當局留意，因此有關新系統嘅全面實施不應拖得太長。當然系統的可靠性和同安全性亦是非常重要，不能掉以輕心。

另外，政府亦應從速全面檢討香港嘅隧道收費政策，釐訂收費高低對使用分配嘅作用。大家都知道，紅隧嘅擠塞情況最嚴重，因為紅隧嘅地理位置最方便，但收費係三條過海隧道中最平，自然想唔塞都幾難。政府應有清晰嘅政策目標，隧道收費是否係以收回營運成本為原則，定係通過收費水平差異嚟達致分流作用，讓駕駛者有「用錢嚟購買時間」嘅選擇。

政府喺2018年提出三隧分流方案，建議透過向西隧公司提供補貼、拉近三隧收費，以紓緩紅隧及東隧嘅塞車問題，但有人擔心最終會變成三隧齊塞，因為紅隧同東隧嘅使用量早已超出原來設計太多。在落實不停車繳費時政府應預早估算對過海交通嘅影響，制訂方案，善用現時有限行車容量及計劃未來道路基建的興建，包括興建第四條過海隧道，而唔係等西隧專營權喺2023年屆滿、政府收番，先至開始做考慮。

根據資料分析，香港近年嘅路面增長遠遠追唔上汽車增長速度，係做成塞車問題嘅其中一個主要原因。香港起路、起橋、起隧道，由研究至落成，快者都要七八年，有啲甚至要搞成十幾二十年，另外，隨着港島及九龍發展飽和，愈嚟愈多市民選擇、或被迫搬到新界區居住，但工作地點就繼續喺番市區，令到喺繁忙時段不少道路，包括屯門公路同吐露港公路等跨區主要幹道都愈嚟愈塞。

隨著新界未來再有多個新發展區落成，居住人口增加，對交通需求大增，政府必須加快各項道路基建的建造。

主席，科技發展為傳統行業帶來很大轉變，要適應新時代，就要不斷提升工作技能和自我增值。推行不停車繳費系統，難以避免會令隧道從業員受到一定影響，而政府早前回應議會時指，會要求承辦商為受影響從業員提供培訓，以擔任隧道其他管理職位，希望政府妥善處理和監察有關安排的實行。

隨著香港社會秩序恢復，政治環境回復平穩，社會期待政府能從速解決香港面對的深層次矛盾，塞車同公共交通問題係其中之一，希望政府能加把勁，回應市民的訴求！

主席，本人僅此陳詞，支持草案二讀、三讀及各項政府修正案。[:]