[:zh]《2021年完善選舉制度(綜合修訂)條例草案》二讀發言[:]

[:zh]主席，香港嘅政治環境，喺回歸後，尤其自2014年嘅違法佔中開始，出現咗四大亂象。第一係違法違憲嘅港獨分裂活動，部分立法會議員喺議會內外，公然支持及煽動他人搞港獨、搞自決、搞公投，企圖將香港從中國分裂出去，淪為外部反華勢力嘅政治傀儡。

第二種亂象係黑暴，有從政者縱容、包庇，甚至鼓吹暴徒四處阻街堵路、縱火破壞，衝擊及佔領立法會大樓，令到議會運作癱瘓，法治蕩然無存。

第三種亂象係拉布，攬炒派議員為求阻撓政府施政、打擊政府管治威信，對政府各類草案、措施、工程、撥款等，無理拉布，嚴重損害香港嘅民生同經濟發展。

最後一種、亦係我認為最離譜嘅政治亂象，就係出賣自己國家及同胞嘅行為。部分香港攬炒派政客，公然勾結外部反華勢力，甚至親身走到外地，乞求外國制裁香港、制裁中國，將全港七百多萬市民、全國十四億人民嘅福祉「攬炒」。

上述種種亂象，某程度源於香港嘅選舉制度存在漏洞，容許一啲唔擁護香港回歸、唔遵從及尊重《憲法》同《基本法》、甚至係唔承認自己係中國人嘅反中亂港分子，透過選舉進身立法會及其他有公權力嘅機構，肆意濫用公權，損害香港嘅繁榮穩定，危害國家嘅安全、主權同發展利益。

主席，中央喺過去一年三度果斷出手，協助特區清除以上政治亂象。首先係去年6月嘅《港區國安法》，為香港社會止暴制亂、由亂至治，有效打擊港獨、黑暴及勾結外部勢力活動。第二係去年11月嘅人大常委會決定，將有違擁護《基本法》同效忠特區規定嘅攬炒派議員逐出議會。

第三係全國人大喺今年3月11日通過，有關完善香港選舉制度嘅決定，加上人大常委會對《基本法》附件一二作出嘅修訂，為特區嘅行政長官選舉、選委會選舉同立法會選舉，堵塞漏洞。今日恢復二讀嘅《2021年完善選舉制度(綜合修訂)條例草案》，正係以本地立法方式，落實有關嘅決定同修訂，全面落實「愛國者治港」原則。

有人質疑今次立法係破壞「一國兩制」、剝奪港人嘅選舉權同被選舉權、令立法會變成「一言堂」、違背《基本法》嘅雙普選承諾，呢啲完全都唔係事實！

創建「一國兩制」構想嘅已故國家領導人鄧小平，早喺1984年年中，即係《聯合聲明》同《基本法》頒布之前，已多次公開闡述「愛國者治港」嘅原則，強調「愛國者治港」係「一國兩制」同「港人治港」嘅界限及標準。今次立法，只係重新確立呢個被部分人遺忘或蓄意忽略嘅基本原則，讓特區政制發展重回正軌、正本清源，而唔係加入乜嘢新嘅要求。

港澳辦主任夏寶龍講得好清楚，完善選舉制度唔等於搞「清一色」。「愛國者治港」嘅定義好簡單，就係愛祖國、愛香港，尊重自己嘅民族，誠心誠意擁護國家恢復對香港行使主權，唔會做損害祖國利益、損害香港繁榮穩定嘅事情。只要符合以上基本要求，香港嘅從政者可以繼續批評政府施政，可以反對、否決一啲佢哋認為唔係最完善、唔符合市民利益嘅法案同撥款。

如果有啲政客，連咁簡單嘅愛國愛港要求都做唔到，將呢啲損害香港同國家利益嘅人，排除喺特區嘅管治體制同選舉制度之外，係完全合理同有必要嘅，咁先可以準確落實「港人治港」原則，確保「一國兩制」實踐行穩致遠。

對於普選，《基本法》訂明要根據香港實際情況同循序漸進原則，最終達致特首及立法會雙普選。今次人大決定同人大常委修訂，並冇改動《基本法》訂明嘅雙普選目標。反而係近幾年香港出現嘅種種政治亂象，先至危害落實雙普選嘅目標，因此必須修例，撥亂反正。

事實上，人大常委會早喺2007年通過，香港可以喺2017年落實行政長官普選。2014年嘅「八三一決定」，更為普選特首作出具體嘅批准同規定。可惜，攬炒派堅持要搞違法違憲嘅「公民提名」，並發起佔領行動企圖威逼中央，又否決政改建議，先至搞到2017特首普選落空，立法會普選無期。所以破壞「一國兩制」、剝奪港人選舉權同阻礙香港民主進程嘅，正正就係呢啲攬炒派。

主席，對於今次條例草案嘅原則方向同主體建議，我係全力支持。但對於個別條文細節，尤其係有關建測規園界立法會同選委會議席嘅產生辦法，我同部分業界人士係有一啲意見，但喺今次發言，我想先指出幾項今次修例未有直接處理嘅問題。

首先，人大311決定就完善香港選舉制度訂立5大原則，其中一項係切實提高特區嘅治理效能。完善特首、選委會同立法會產生辦法，係有助清除妨礙特區有效管治嘅負面因素，但要切實提升治理能力，就必須由行政機關、由管治班子做起，包括特首、主要官員同全體公務員。所以，加快優化公營部門體系，洗脫政府予市民做事「慢」同埋「推」嘅形象，係迫切同重要嘅。

國家主席習近平強調，管治者必須堅定理想信念、更新知識觀念、掌握過硬本領，自覺站在國家大局上想問題、辦事情，以及要建立健全激勵機制，推動形成「能者上、優者獎、庸者下、劣者汰」嘅正確導向，為改革者負責、為擔當者擔當，希望特區政府會做得到。

此外，要確保「一國兩制」行穩致遠、香港嘅長治久安，多個由回歸前已積落嚟嘅深層次問題，包括土地房屋問題、教育問題、青年問題、政府嘅輿論文宣，仲有近年湧現嘅網上假資訊、假新聞等等；正如副總理韓正指出，呢啲問題不論有幾咁困難，都總要有開始解決嘅時候，政府必須果斷、有效、全速去解決。

本人僅此陳詞，支持草案二讀。[:]