《2021年業主與租客(綜合)(修訂)條例草案》修正案第一次發言

主席，剛剛通過二讀嘅《2021年業主與租客(綜合)(修訂)條例草案》，原本建議將劏房租金加幅限制喺最多15%，唔少市民聽落覺得過高，但其實呢個係每兩年調整一次嘅加幅上限，根據草案，劏房嘅加租幅度，係唔可以高過同期嘅市場平均租金嘅升幅。根據過往差估署嘅數據顯示，每兩年嘅市場租金升幅，絕大部分年份都低過15%，有時甚至係負數。

不過，因應多個政黨及關注團體嘅政治壓力，政府現時提出修正案，將加租上限由15%降低至10%，希望加強對劏房租戶嘅保障。用意係好嘅，但係咪可以令到劏房租戶唔使俾咁高嘅租金呢？呢點我係好有保留嘅。

正如我喺二讀辯論中指出，草案未有為受管制嘅劏房，訂定「起始租金」或「合理市場租值」，就算將加租上限再降低啲，對租戶都未必有幫助，因為業主可能會趕喺草案生效之前預先加定租，令租戶未見其利，先受其害。如果將來嘅市場租金升幅根本未達到10%，劏房租戶因業主預先加租而導致更早便要交更多租金，導致雙重受害。

政府話香港嘅劏房單位五花八門，面積、位置、間格、設施同質素都不一樣，現階段冇足夠數據去制訂「市場租值」。但講到劏房嘅加租幅度限制，政府又用番市場住宅嘅平均租金升幅嚟做標準，真係自相矛盾、自打嘴巴。

作為一位資深嘅產業測量師，我認為只要政府有心，冇理由唔可以為劏房制訂一個合理嘅市場租值。我明白劏房嘅呎租，對比起同等嘅住宅單位嘅市場租值應該會高嘅，因為相關業主要作出額外嘅使費去改建單位，但幅度亦都唔應該冇晒譜。

政府話想等劏房租管實施一段時間，掌握到一定數據，先去制訂劏房嘅起始租金或合理租值，我覺得道理係非常牽強，因為乜嘢叫做市場租值，喺國際上、學術上、專業上係有定義嘅，其中一個元素係租賃雙方要地位對等，包括喺資訊上、知識上同議價能力上。

但係香港嘅劏房租戶，絕大部分都係處於弱勢，資訊嚴重不足，議價能力極低，部分人嘅知識水平亦都唔高，政府喺咁嘅情況下取得嘅劏房嘅租金數據，一定係遠高於合理租值。如果利用呢啲數據來釐訂劏房嘅起始租金，只會將唔合理嘅現象合理化！背棄立法去保障弱勢租戶嘅原則。 不過，我亦明白劏房租管立法現已去到「埋門一腳」，加上今屆立法會嘅會期即將完結，難以再對草案內容作出大幅改動，甚至推倒重來，所以我亦唔會反對政府嘅修正案。我講到呢度先，稍後我會再就石禮謙議員同政府嘅其他修正案發言。