《2021年業主與租客(綜合)(修訂)條例草案》修正案第二次發言

主席，剛才我已回應咗有關劏房加租上限嘅問題，嚟緊會講吓政府嘅其餘幾項修正案。

首先係劏房嘅定義，呢個問題喺草案審議階段討論最多，引起多位議員不滿，因為社會原本希望規管嘅，係一啲環境好差，由一個單位改成幾個、甚至十幾個嘅住所，畀多個家庭迫埋一齊住嘅所謂劏房。但根據草案嘅原建議，一啲冇經過改動嘅原則單位，業主想將其中一間套房租出，都會跌入條例嘅規管範圍，受到相關嘅加租同續租條文限制。政府現在提出修訂，把業主將自住單位嘅某間房或床位出租，而唔涉及將單位劏開嘅租賃，剔除喺租管範圍之外，係合理嘅做法。

另一組修正案係有關二房東將劏房分租畀租戶嘅責任，呢種情況喺香港係頗為普遍嘅。一旦二房東同業主之間嘅上級租約完結，作為三房客嘅劏房租戶享有乜嘢保障呢？我同多位議員都好關注，但同時亦要平衡守法業主嘅應有權益，尤其係當業主根本唔知道二房東已將單位以劏房形式出租。政府喺聽咗議員意見之後，提出修正案釐清相關嘅收樓、通知同補償嘅程序，亦係值得肯定嘅。

石禮謙議員提出嘅修正案，建議所有已向法庭申請進行強拍，以及已獲政府批准拆卸重建嘅樓宇，裡面嘅劏房單位可以豁免受到草案規管。佢嘅出發點我係非常認同嘅，就係唔應該因為實施租管，阻礙或拖慢咗舊樓同舊區嘅重建。因為進行重建，正正係其中一個，可以有效改善市民居住環境同增加房屋供應嘅方法，有助香港加快解決居住問題，告別劏房。

但正如政府指出，石議員嘅修正案存在唔少技術同草擬問題，尤其係冇對業主申請強拍重建，施加一啲時間限制，令到有關豁免條款，有機會被一啲無良業主濫用，藉此逃避劏房租管。但係，點解政府唔作出更完善嘅修訂呢？係唔係因為急於喺今屆立法會會期內通過呢條條例呢？

我希望當局會跟進佢嘅承諾，密切留意劏房租管嘅實施，會否對市區重建造成負面嘅影響，作出相對應嘅行政調整，並且喺有需要時從速進行修例。我亦都希望政府會留意另一方面嘅影響，就係會唔會有啲業主，因為擔心會拖慢重建，即使未收夠一定份量嘅業權，都寧願將單位丟空，不作出租，從而導致出租單位減少，浪費咗一啲正在等候重建，但仲可以供人租住好一段時間嘅單位。本人僅此陳詞。