《2021年立法會(紀律制裁及遙距會議)(雜項修訂)條例草案》二讀發言

主席，受到攬炒派嘅瘋狂拉布同不斷升級嘅議會黑暴影響，香港立法會嘅議政質素、議事效率同議會文化，喺過去十年每況愈下，導致特區施政舉步維艱。政府推出嘅良好政策措施同立法建議，往往完全做唔到，或者做得好慢，嚴重削弱其成效，令香港嘅經濟民生發展不進則退。

中央喺去年中訂立《港區國安法》，為香港社會止暴制亂、由亂至治；人大常委會喺去年底就立法會議員資格問題進行釋法，為議會掃除黑暴、踢走攬炒；喺今年初通過嘅人大「三一一」決定同相關嘅修例工作，堵塞咗選委會、立法會同行政長官選舉過往出現嘅制度漏洞，為特區政制撥亂反正，為落實「愛國者治港」原則提供咗制度保障，為「一國兩制」行穩致遠奠定咗堅實嘅基礎。

喺立法會嘅議事程序方面，過去一年我哋已先後通過咗多輪修訂，對立法會嘅《議事規則》、《內務守則》，以及財務委員會及其轄下兩個小組嘅會議程序，作出咗相當全面同細緻嘅優化更新；一方面要杜絕攬炒拉布行為，重建議會嘅秩序同形象；另一方面亦為立法會下屆增至有90名議員做好準備，從規程上促進高效、高質嘅審議工作，更有效咁發揮行政立法互相監察、互相配合嘅憲制職能。喺呢度，我要再次向立法會議事規則委員會、立法會秘書處，以及其他曾經為相關修訂出過力嘅議員同人士致謝。

今日恢復二讀嘅《2021年立法會(紀律制裁及遙距會議)(雜項修訂)條例草案》，其目的之一，就係落實兩項必須透過修改法例先做到嘅議事規則委員會建議。其一係對因行為極不檢點而被暫停職務嘅議員，根據佢哋被罰「停賽」嘅時間長短，按比例咁扣減佢哋嘅議員津貼同酬金。其二係對於喺立法會因法定人數不足而流會時，冇合理原因而缺席嘅議員施以罰款。

對於議員嘅極不檢點言行，包括爆粗、掟蕉、掟杯、搶文件、搶手機，以至後期嘅撥臭水、掟臭蟲等，乜嘢下三流嘅招數都出晒，嚴重影響議會工作同破壞議會形象，呢啲行為其實罰幾多錢都補唔番。但有罰則始終係好過冇，如果純粹將行為不檢嘅議員停職，但又容許佢哋如常出糧同申領工作津貼，對納稅人就更加唔公道，因此我係支持有關修訂嘅。

對於扣減無理缺席會議嘅議員酬金，我之前講過係唔應該寫得太死。我認為只要喺一定嘅通知期之前，以書面方式正式向立法會主席請假，都應可視作為有合理原因下缺席。

對於扣減金額，我就認為可以再「辣」啲，採用累進罰則，即係同一位議員喺無合理原因下缺席得愈多次，罰款金額就會遞增，以提高阻嚇力。今次草案只訂明立法會有權扣減議員薪津，但冇規定扣減金額或計算方法，我覺得係好嘅做法，希望議事規則委員會將來討論有關扣薪機制嘅細節時，可以考慮我嘅意見。

草案嘅另一部分建議，係為咗喺特殊情況下，以視像方式舉行立法會大會及其他委員會會議，制訂相關嘅法定程序。

喺新冠疫情最嚴重嘅時候，立法會唔少會議都被迫取消或押後，以減低疫情進一步散播嘅機會。到其後大家都意識到，議會工作冇可能因疫情而無限期咁拖延，就開始喺部分委員會引入視像會議。但基於法律上嘅不確定性，立法會大會、內委會、財委會及其下兩個小組委員會，都維持實體會議，以免影響相關法案同撥款嘅有效性。

經過今次修例，將來立法會嘅各種會議，都可以喺特殊情況同得到議員同意下，以視像等方式遙距進行，並確保喺遙距會議上通過嘅議案係合法同有效。有關特殊情況唔單係指疫情，喺發生大型天災、暴亂，以至恐怖襲擊情況下都適用。當然我同大家都唔希望會用到，但唔怕一萬，只怕萬一，尤其我哋經歷過立法會大樓遭到暴徒佔領同破壞嘅「黑歷史」，今次修例係有必要嘅。

主席，最後我想再講吓，喺剛過去嘅周六日，我先後主持咗建測規園界當然選委與業界嘅交流會，以及參與由各界選委喺全港多區開設嘅「落實愛國者治港、推動良政善治」街站，向業界同市民講解新嘅選舉制度，同時聽取佢哋對政府施政及香港發展嘅意見。可以感到受，其實唔少普羅市民以至專業人士，都並唔太在意選舉制度嘅細節。佢哋最關注嘅係，點樣先可以加快香港嘅經濟發展、點樣可以提升特區嘅城市建設，以及點樣可以改善自己同其他市民嘅生活。

事實上，人大「三一一」決定強調嘅，不單止係落實「愛國者治港」原則，仲要「切實提高特區治理效能」。無論係有關完善選舉制度嘅立法、有關公職人員宣誓效忠嘅規定、定係有關立法會議事規程嘅修改，除咗係要杜絕外部勢力干預同攬炒拉布行為，其最終目的都係要達致良政善治，實實在在咁，改善全港七百多萬市民嘅生活。所有嘅選委會委員、立法會議員、特區官員同行政長官，都必須將此銘記於心，並付諸實行。本人僅此陳詞。