「推動抗日戰爭歷史的教育」議案

主席，感謝劉業強議員提出今日嘅「推動抗日戰爭歷史的教育」議案。部分香港市民、尤其係青年人嘅國民身份認同感薄弱，原因之一係對國家、對香港嘅歷史缺乏認識，更甚係缺乏正確嘅認識，畀人有意無意咁歪曲同誤導咗，形成錯誤嘅國家同民族歷史觀，例如係以為英國人發動鴉片戰爭係為咗消滅鴉片，以為日本侵華可能係利多於弊。

議案促請特區政府積極推動抗日戰爭歷史教育，藉此提升港人對國家同民族嘅認同感與歸屬感，令更多人明白捍衛國家安全嘅重要性，我係非常支持嘅。作為建測規園界嘅代表，我會集中講吓議案嘅另一重點，就係加強對抗戰文物嘅保育同推廣工作，將更多抗戰遺址列為法定古蹟、設立抗戰文物徑及導賞團等。

香港大學一支研究團隊，經過長達10年嘅考察研究，早前公布喺沙頭角鹿頸一帶，發現咗十多個過往從未被記錄嘅二戰槍堡遺址，相信係由當年嘅日軍興建，用嚟應付當時活躍於新界北部、不時對日軍發動遊擊戰嘅東江縱隊。有關遺跡反映，「香港保衛戰」並非好似好多西方嘅歷史書、以至部分本地教科書咁講，喺1941年嘅聖誕節、駐港英軍宣布投降後就完結咗。喺三年零八個月嘅日佔時期，好多香港人、中國人，一直都未有投降，繼續同日軍奮戰，直至二戰結束為止。

翻查資料，古諮會早喺2009年，已將位於鹿頸嘅多座機槍堡同觀測台，列為二級歷史建築，但之後就冇再理，冇宣傳、冇推廣、冇任何維護同保育方案，由得呢啲具歷史價值嘅建築物繼續風吹雨打，自生自滅。除咗極少數嘅專家學者同二戰發燒友，根本冇人知道相關歷史同遺址。呢個亦係香港好多歷史文物嘅現況，雖然列咗做歷史建築、甚至法定古蹟，但往往只係保而不育，發揮唔到應有嘅紀念歷史同教育作用。

早前亦有電視台做咗個調查報道，訪問咗我哋業界嘅建築師，指出原來喺港島市區，都隱藏咗唔少二戰歷史遺跡，包括防空洞、地道、軍火庫等，但好多都冇交到畀古諮會評級。原因之一係呢類臨時軍事建築，喺建築技術同美感等方面，其實冇乜特色。抽空睇其中一兩項建築物，各自嘅保育價值亦可能唔高。但如果串連埋其他抗戰遺址同文物，加埋相關嘅歷史資料，變成文物徑，有埋導賞團，就可以更完整、更生動咁講出香港嘅抗戰歷史。

我尋日上古蹟辦網頁睇過，裡面講到全港有1,444幢歷史建築已完成評估，但評咗級之後又點呢？仲有幾多幢建築物等緊評級、要等幾多年先至做得晒呢？我搵唔到網頁有交代。而且有關網頁上一次修訂已係2020年3月嘅事，即係過去一年半都冇更新過。 政府喺文物保育方面有幾積極、主動呢？如何避免一啲重要嘅抗戰遺址，唔會好似主教山配水庫咁，差啲畀人拆卸呢？希望官員可以解答一下，但唔好話又要成立多一個局，或者開多幾個首長級職位先可以做到嘢。本人僅此陳詞。