《2022年撥款條例草案》(2022-23年度財政預算案)全委會審議階段發言

主席，以下係我就草案第2條、總目140、「政府總部：食物及衞生局(衞生科)」嘅開支發言。喺2022-23財政年度，呢個總目嘅預算開支高達1142.5億元，佔政府全年開支嘅16.4%，係今年撥款額最高嘅開支總目。

香港面對世紀新冠疫情，進行治療同檢測，購買藥物同疫苗，樣樣都要錢，食衞局嘅衞生服務開支創新高，好多人都覺得係無可厚非。但我關注到，呢一千一百多億元公帑，係咪用得最有效、最可以幫到市民呢？面對人口不斷老化，公共醫療開支屢創新高，沿用政府依家嘅方法咁做落去，長遠係咪應付得嚟呢？

最近，我同G19成員先後與內地嘅援港醫療專家，同埋研究本港醫療問題嘅專家會面交流，我睇到香港嘅醫療系統出現咗兩大失衡。第一係中西醫失衡，過份偏重西醫西藥。第二個失衡係醫院服務與預防性醫療嘅失衡。

食衞局呢一千一百多億元，有九百多億元係畀醫管局嘅。醫管局顧名思義係管理醫院嘅服務，但係喺預防性治療方面，我相信使喺呢方面嘅資源係非常、非常之少嘅，啲錢係咪用得恰當呢？尤其依家我哋唔單止應該着重醫院嘅管理，市民嘅健康都係重要嘅。我希望財政司司長喺利用資源方面，係咪要多關注用喺預防性嘅治療，使到公帑用得更有效益。本人謹此陳詞。