《2022年道路交通(修訂)(自動駕駛車輛)條例草案》二讀發言

主席，本人係發言支持《2022年道路交通(修訂)(自動駕駛車輛)條例草案》。草案旨在就我哋一般叫做「無人駕駛車輛」，制訂全新嘅法定規管框架，希望促進有關技術及產品喺香港嘅研發同應用，同時確保當容許無人駕駛車輛喺香港路上行駛時，各類道路使用者嘅安全會繼續受到保障；一旦不幸出咗意外時，相關人士會承擔應有嘅刑事同民事法律責任。

講起「無人駕駛」，大家十都可能會諗係完全取代真人司機，其實係仲有好多唔同應用嘅。例如唔少駕駛人士都認同，香港啲停車位設計又細又窄，自己泊好架車，有時連打開車門落車都唔夠空間，有困難。其實有唔少新出嘅車輛，都已經設有無人駕駛自動泊車同攞車嘅程式，可以泊得好準繩，車速亦唔會構成乜嘢安全問題。但由於現行法例規定任何車輛行駛時，都一定要有真人司機坐喺車裡面去控制，所以即使係咁簡單、安全嘅技術，我哋依家暫時都享用唔到。

隨着香港人口持續高齡化，無人駕駛亦可以作為輔助年長司機駕駛嘅一種工具，作為防止意外發生嘅一重保險。對於一啲身體差咗少少，但仲係好想自己照顧自己、得閒【渣】架車周圍逛下嘅長者，無人駕駛技術都幫到手。因此，無論係從方便市民、保障安全，以至係應對人口老化同勞動力不足等方面，香港都應該盡快引入無人駕駛車輛。

事實上，無人駕駛嘅設施系統喺好多地方，包括我哋國家嘅城市同汽車生產商，都已經相當成熟同廣泛應用。當然大家都明白，香港嘅交通規則、路面情況、司機同行人嘅習慣等，同內地或外國都不盡相同。喺引進相關技術同車種時，需要進行一定嘅路面測試，讓相關無人駕駛系統熟習香港嘅狀況。其實往往唔係擔心唔安全問題，而係避免因為有關系統太過安全，其他車稍為駛得近啲、密集啲，尤其係去到隧道口或迴旋處，啲車會停晒喺度，影響車流量同造成擠塞。

唔少市民都指出，香港現行法例同規管制度，以及負責有關監管、審批工作嘅政府官員，往往都係過份着重安全，對相關路面測試重重設限；或者係要求申請者不必要咁，重複進行一啲喺其他地方已做過好多次同通過嘅測試；令到香港引入無人駕駛技術嘅進程，嚟得又慢、又少、又貴。

所以，我同好多議員同事一樣，對於今次立法嘅原則係相當支持嘅，甚至可以話係充滿期盼，認同條例草案內容唔應該寫得太死，以便靈活咁應對、同配合無人駕駛技術嘅不斷改進。但與此同時，我同部分議員，對於草案只係設立咗一個規管框架，好多嘢都冇寫清楚，好多細節都係賦權咗畀運輸及物流局局長、同運輸署署長去制訂同審批，係感到有一定嘅憂慮。

我哋係擔心局長同署長，會好似以前某啲部門同官員咁，只着重安全，對創新抗拒；或者係只顧做「監管者」，而忽略咗同時要扮演好「促進者」嘅角色；令到香港嘅科技研發同應用，經常都落後於人，遲遲都未能造福市民。

香港嘅創科發展應用遲緩，除咗部分官員嘅保守、自保，同少做少錯心態，部分香港市民對國產科技同產品嘅抗拒心態，亦係重要因素之一。經過40多年嘅改革開放，我國嘅科技研發同產業發展，喺多個方面都經已達致相當高嘅水平。呢個正係以美國為首嘅多個西方國家，近年千方百計咁阻撓我國嘅創科企業進軍當地，以及透過無理嘅制裁同禁運，嚟阻慢有關企業嘅生產同研發。

香港回歸祖國已接近26年，但偏偏仲有唔少人好似嗰幾位空姐咁，誤以為外國嘅嘢就係最好，香港嘅就係次等，內地嘅就係低等。事實上，正如當局喺法案委員會上指出，依家喺香港做緊測試同應用嘅無人駕駛車輛，大部分都係由內地研製嘅。但政府喺制訂本條例草案建議嘅規管制度時，就只係參考咗美國、澳洲、加拿大同新加坡嘅法例，冇參照到內地嘅相關法規同標準。

政府解釋，因為香港同內地嘅法制有所不同；又強調運流局局長同運輸署署長，喺制訂相關規則同簽發行車許可證時，都會參考內地嘅標準。當局亦會承認申請者喺內地進行無人駕駛測試槪相關經驗，豁免佢哋喺香港再做一次同類嘅測試，以及會積極推動大灣區內嘅無人駕駛同車聯網技術嘅互聯互通。

我希望政府真係講得出，做得到，而唔係講一套，做一套。我希望草案今日三讀通過後，我好快就可以享受到自動泊車所帶嚟嘅好處，唔使擔心因為車位迫到開唔到車門而攞唔番架車。本人謹此陳詞，支持草案二讀、三讀同各項修正案。