「完善新界交通網絡，配合北部都會區發展」議案

管主席，首先申報我係由財政司司長擔任主席嘅「北部都會區諮詢委員會」委員，但對於北都發展，我並冇直接或間接金錢利益。不過話說回來，其實整個北都發展對於每一位香港市民，都係利益攸關嘅。我代表嘅建築、測量、都市規劃同園境業界，對北都發展尤其關注，唔係因為可能多咗工作機會，更重要係希望透過北都發展，嚟促進香港嘅經濟同城市建設，讓各階層市民都可住大啲、住鬆啲，同時紓緩交通擠塞及促進碳中和。

香港園境師學會早前舉行周年大會暨研討會，就以北都發展做主題。多位講者提到北都發展可為香港帶嚟好多機遇，而我就集中講可能面對嘅局限同挑戰，包括規劃用途限制、如何妥善處理區內受影響嘅居民同土地使用者、如何整合現存同推展中嘅各個發展區等。但當中最迫切嘅挑戰，就係今次議案提出嘅交通網絡問題。

好多議員都指出，政府強調「基建先行，創造容量」嘅發展原則，先後喺北都提出咗最少7條新鐵路同3組主幹道項目。前者有港深西部鐵路、北環綫主綫及東延綫、東鐵綫北延綫、中鐵綫、流浮山至白泥自動捷運系統，以及將北都與中部水域人工島連接起嚟嘅跨海鐵路與道路等；行車主幹道方面，有十一號幹線同屯門繞道，以及去年施政報告提出嘅北都公路等等，剛才局長都有提出。

上述10項運輸基建計劃，聽落係相當宏大完備，有助大幅改善北都嘅對外同對內連接，提升居住質素及產業發展容量。但問題係呢10大基建，全部都仍然處於前期規劃、設計勘測，以至非常初步嘅概念性構思階段，部分項目連目標動工年份都欠奉。

北都嘅洪水橋新發展區，最快明年就有首批居民遷入，之後古洞北/粉嶺北同元朗南發展區亦會陸續入伙，與各項運輸基建嘅落成進度出現相當大嘅時間差。點樣避免首先入住嘅居民唔會變成「開荒牛」呢？如何確保新增嘅的人口同產業，唔會對現有居民生活及其他使用者，造成難以承擔嘅影響呢？除咗想辦法縮短上述發展時差，一啲短中期嘅紓緩措施亦係必需嘅，希望局長陣間就呢方面講講。

同覓地建屋工作一樣，要加快建設運輸基建嘅速度，必須多齊下咁去做，包括精簡相關嘅法定程序同行政審批流程。對於政府申請開設多個首長級職位，用以成立北都鐵路辦事處，以至可以增設獨立一個鐵路署，聲稱可以加快各項新鐵路嘅推展，部分業界係有保留嘅，擔心多咗個部門、多咗幾個高官、多咗幾隊人做監管同審批，會唔會反而令相關規劃研究同鐵路工程愈做就愈慢。

要有效加快鐵路項目推展，唔能夠單靠政府，相關業界嘅人手、技術、同競爭力都好重要，適度增加引入內地嘅企業同專才，係值得支持嘅。我嘅相關意見，喺之前已表達過，時間關係我唔再重複。本人謹此陳詞，支持原議案及各項修正案。