《2022年院舍法例(雜項修訂)條例草案》二讀發言

主席，以下係我個人對條例草案嘅意見。香港現時面對不少民生問題，其中最主要嘅除咗土地房屋外，我認為就係人口老化問題。

喺早兩個禮拜嘅「樂齡科技」同「人口政策」議案辯論，我已批評過特區政府，一直未有正視同制訂全面嘅人口政策，令到香港嘅「少子化」同高齡化情況加劇。對於老人家嘅生活同照顧，政府過往亦係偏重於提供社會福利、醫療服務同院舍服務，以為向長者發放多啲福利金，送佢哋去醫院同老人院，就係做到老有所依、老有所養，忽略咗預防性嘅醫療保健同長者嘅心靈健康，亦冇喺樓宇設計同城市規劃上，提供更友善嘅設施同埋安排，促進居家安老同長幼共融。導致唔少老人家即使有醫生睇，有地方住，都生活得好唔開心。

對於一啲已喪失自理能力，佢哋嘅家人又因為種種理由，無法提供妥善照顧嘅長者，優質嘅院舍服務係必須嘅。今日恢復二讀嘅《2022年院舍法例(雜項修訂)條例草案》，目的就係提升香港各類安老院舍，以及殘疾人士院舍嘅質素，包括提高法定嘅最低人均面積同人手要求，加強對院舍營辦人同管理層嘅監管等等，以改善院舍住客嘅生活環境，減少出現疏忽照顧、以至虐待院友嘅機會。

以上改革原則同方向，都係好值得支持嘅。但對於好多畀唔起錢入住私營安老院舍，又遲遲未輪候到資助院舍宿位嘅長者同家人嚟講，數量同質量都係同樣重要。對於部分現時位於舊式樓宇嘅中小型私營院舍，佢哋都想畀到長者更加寬敞、舒適嘅生活環境，問題係根本搵唔到足夠嘅地方，或者畀唔起更多嘅租金。呢個又返番去我一開始講到嘅土地房屋問題。

香港土地資源珍貴，無論係政府定係私人土地，首先梗係用嚟起住宅、商場、寫字樓，以至學校、街市、體育館等社區設施，往往排到好後先會諗到用嚟做院舍，導致安老同殘疾院舍宿位長期不足，每年都有數以千計嘅長者，等到去世都未輪候到資助宿位。

政府亦知道問題所在，多年來推出咗多項計劃，希望增加院舍用地同宿位供應。其中喺2003年推出嘅「鼓勵在新私人發展物業內提供安老院舍院計劃」，希望借助市場力量，透過免補地價嚟鼓勵私人業主、企業興建安老院舍。結果計劃推出20年，據我了解至今只有1個成功項目。

早前我聯同幾位G19議員同一批建測規園界人士，去咗參觀呢個私營院舍，設施係相當唔錯嘅，應用咗好多樂齡科技同長者友善設計。但由於相關審批部門各自為政，欠缺積極性，部分政策措施同設計標準更不時更改，整個項目由申請、審批、建成，以至最後獲批院舍牌照可以正式營業，一共花咗接近13年嘅時間，嚇怕咗好多本來有意參與計劃嘅私人業主，令人氣餒。

政府喺2013年，再推出另一個計劃，叫做「私人土地作福利用途特別計劃」。轉為向非政府機構嘅埋手，包括一啲慈善同宗教團體，希望佢哋可以協助政府興建安老及殘疾院舍。計劃開始時頗受歡迎，一共收到73項申請。但10年過去，只有6個項目完工、2個項目起緊、8個處於詳細設計階段；即係仲有57個項目、接近8成嘅申請仲係動工無期。

其中一個個案曾經搵我求助，可以話係我近年來處理過，最令人失望嘅個案。寫信畀部門，遲遲都唔覆，覆都係覆啲廢話；約開會唔肯，一時就話疫情，一時又話要等埋其他部門回覆，幅地曬咗7、8年太陽都仲未開到工。直到後來勞福局同社署都換咗人，事情先至有所進展。咁嘅效率同速度，咁嘅官僚態度，實在令人非常不滿，影響團體同政府合作興建院舍嘅動力。

政府近年再推出多項計劃，包括規定新建公營房屋項目，須預留5%嘅樓面作為社福設施，應該會有一定成效嘅。但另一項措施到現時都算相當失敗，就係撥款200億元，畀社署購買私人物業作福利設施用途。原本希望喺3年內購入約120項設施，但到依家，我理解都只係買到兩項。

政府近年仲有一招，就係喺部分賣地條款中，要求私人發展商幫政府起埋安老院等社福設施。發展商為求投得土地，一定肯幫政府起嘅，而且一般會起得更快、更好、同更平。但其實佢哋都會考慮到政府嘅官僚作風、審批繁複、各自為政等常見嘅風險，尤其擔心相關嘅附屬設施，會否拖累咗主體發展項目嘅完工時間，因此喺落標出價時會非常、非常謹慎一啲，令庫房收入因而減少。

講咗咁多有關政府增建安老院舍嘅失敗例子，好似同草案內容無關，其實係息息相關嘅。我喺草案審議期間，會見咗多個院舍業界代表，有公營亦有私營、有大亦有細、有老闆亦有前線員工，佢哋都係好支持提升院舍質素，希望做到習主席提出嘅，讓老人家得到嘅照顧可以更好一些。

但係業界同時好擔心，例如為咗符合草案嘅新規定，而需要改動院舍間格或搬去新嘅地方經營，政府要用幾多時間去審批呢？對於人手不足問題，政府話會加強本地培訓同加快輸入外勞，業界擔心政府係咪真係做得到，以及要用幾多時間先至做到？會唔會好似之前嘅多項增建院舍嘅計劃咁，都係成效不彰呢？

主席，唔少人對今屆政府係有期望嘅，希望佢哋喺增加長者同殘疾院舍供應方面，都可以做到提速、提效、提量、提質。關鍵係要改變官員嘅處事心態，唔係只做「監管者」，同時要做好「促進者」嘅角色；要將有為政府與高效市場更好結合，為我哋嘅老人家同殘疾人士，提供更優質同足夠嘅服務。本人謹此陳詞，支持草案二讀。