《2022年院舍法例(雜項修訂)條例草案》全體委員會階段發言

主席，由我擔任主席，負責審議《2022年院舍法例(雜項修訂)條例草案》嘅法案委員會，合共召開咗9次會議，包括其中一次4個小時嘅會議，次數同鐘數唔算最多，但跨越嘅時間就較長，差不多前前後後審議咗1年時間。當中暑假休會、疫情因素之一，多間安老及殘疾院舍，喺第五波疫情期間連環爆疫，令業界以至社署都疲於奔命處理，某程度影響咗審議進度。

另一個因素我覺得係較為正面嘅，就係政府好認真聽取議員同業界嘅意見，尤其喺院舍人手不足方面。草案要求院舍提高人手比例嘅規定，係好難做得到嘅，因為業界依家已好唔夠人。除咗因為香港整體勞動力短缺，院舍照顧工作本身係相當辛苦，有一定嘅厭惡性，而且晉升機會唔多，令到好多年輕人、甚至中年人都唔願意入行，從業員老化問題亦都相當嚴重。

近年政府先後提出咗多項計劃，一方面喺本地培訓更多合資格嘅護士、保健員同護理員；一方面加大同加快輸入更多相關嘅專才同勞動力，希望喺短、中、長期增加院舍業界嘅人力供應。當局亦會就院舍護理行業，制訂更完善嘅資歷架構同晉升階梯，幫業界吸引同留住人才。

政府喺呢方面嘅努力，係值得肯定嘅。但不論係輸入定係培訓人才，都係需要時間，政府因此提出修訂，將草案內有關高度照顧院舍嘅保健員同護士嘅最低當值時數規定，分別押後至最快2026同2028年才實施，等大家有多啲時間去提供更多合適嘅人手。剛才局長都講，依家仲有好多措施做緊。

我明白有業界人士表示，押後嘅時間仍然未必足夠，有議員更提議過，不如索性唔好喺法例訂明生效日期，等條件成熟後，先至透過附屬法例予以實施。有關建議我係唔認同嘅，擔心冇目標，冇時間表，政府同業界就未必咁積極去做，令到有關規定落實無期。

其餘幾項政府嘅修正案，包括更清晰訂明業界須向政府申報嘅事宜，規定局長同署長喺作出某些決定或裁決時，必須以書面通知受影響業界同說明當中嘅理由。呢啲修訂表面好似係好技術嘅，但其實都反映咗一個普遍現象，就係政府喺制訂相關嘅法規、程序同指引時，往往都係站喺自己角度去諗，給予政府最大嘅保障同彈性，但往往就令到業界無所適從，虛耗時間同資源去揣摩政府嘅諗法，做多咗好多不必要嘅工作。

有關情況喺我哋建測規園業界亦經常面對，但部分社署官員嘅官僚程度，比起好多工務部門人員係有過之而無不及。局長建議嘅修訂，我覺得係從善如流，希望主事官員改變心態，積極行事，同業界一條心提升香港嘅院舍質素，為長者同殘疾人士提供更優質嘅服務。本人謹此陳詞，支持各項修正案。