《2023年撥款條例草案》(2023-24年度財政預算案)全體委員會審議階段發言

主席，我發言係支持將84個開支總目嘅款額納入附表，並想講下我對部分開支總目嘅睇法。

正如我喺二讀辯論時指出，政府開支近年急速膨脹，主因係社福、醫療、同教育呢3大民生開支大幅上升，以及公務員嘅編制同薪酬支出增加。本年度預算案撥款額最高嘅4個開支總目，正好係社會福利署、醫務衞生局、教育局、以及公務員嘅退休金開支，款額分別1122億、944億、784億同480億元。呢4個總目嘅開支加埋晒等於3330億元，佔今年《撥款條例草案》嘅總撥款額嘅超過一半。

社福開支上漲，令部分人擔心香港會變成福利社會。其實我最關注有關開支係咪用得其所，幫到有需要嘅市民，定係好容易被人濫用；係咪可以有效咁協助基層脫貧，定係變成「養懶人」。醫療開支上升主因係人口老化，但係咪可以做好預防性及基層醫療，去減慢開支升幅呢？能否透過善用創新科技同利用私人市場力量，去提供更優質嘅醫療、護理同安老服務呢？

教育開支方面，教育局嘅撥款額主要係做中小學同幼稚園教育，加埋大學教育資助委員會今年嘅231億元撥款，就超過1000億元。我認同大學教育係值得加強投資嘅，但近年唔少人都質疑，部分大學嘅開支係咪用得其所，包括開辦資助學位課程同學額分配方面，係咪配合到政府嘅政策、香港嘅未來發展，以及市場嘅人力需求呢？呢方面政府應扮演主導角色，唔應該話因為大學主自，所以政府就唔理。

對於深受社會關注嘅房屋問題，今年房屋局嘅開支係73億元，相對於其他政策局唔算好多，主因係香港大部分公營房屋嘅興建同營運，相關開支係計咗入香港房屋委員會嘅帳目裡面，未有喺政府一般帳目中反映。

房委會喺2023/24年度嘅預算開支係超過513億元，比22/23年度增加咗35%，預計未來仲會繼續升。原因大家都知嘅，亦係大部分市民同議員所樂見嘅，就係房委會起樓起得多咗、快咗，需要管理嘅屋邨多咗，部分樓宇同設施變得舊咗，因而要花更多錢做維修保養。呢啲開支冇寫《撥款條例草案》，但其實都係納稅人嘅錢。係咪可以透過善用科技，以及精簡相關法定同行政程序，去降低公營房屋嘅建造同管理支出呢？

主席，根據上述嘅開支總目分析，要有效控制開支，為市民解決困難，提供優質嘅服務，關鍵係善用資源，做出成效，確保各類社會福利、房屋福利、教育開支，一分一毫都係用得其所，減少浪費，同埋杜絕濫用，優化行政和法定程序係必須，促使公務員提升績效、積極性、主動性，都係必須嘅。謹此陳詞，支持將有關總目同條文納入，以及支持《2023年撥款條例草案》三讀通過。