《2023年行車隧道(政府)(修訂)條例草案》二讀發言

主席，同一啲大城市一樣，香港不時會出現塞車情況。當中較為嚴重係繁忙時段嘅紅隧過海交通，喺嘅繁忙時間，車龍往往會塞到一啲非過海路段，連唔係過海、唔係行紅隧嘅市民都受到影響。點解咁多人選擇使用紅隧呢？係因為佢位處港島同九龍中部，連接交通最為方便，同時收費亦係現時三條過海隧道中最平。

政府喺2018年曾經提出「三隧分流」方案，建議透過調高紅隧及東隧收費，以及用公帑補貼西隧公司，換取西隧減價，藉此拉近三隧嘅收費水平，增加西隧嘅使用量，從而紓緩紅隧嘅擠塞問題。當年我同幾位G6成員，係少數公開表態支持分流方案嘅議員，但由於涉及加費，政府未必有把握得到大多數政黨議員支持，最終要將方案撤回。

5年過去，政府今次重提調整過海隧道收費，即係我哋依家審議緊嘅《2023年行車隧道(政府)(修訂)條例草案》，似乎已兼備咗天時、地利、同人和。天時係咩呢？就係西隧專營權將於今年8月屆滿，令到三條過海隧道全部歸番政府管理，當局今後喺釐訂隧道收費時，可以集中去考慮運輸政策同交通管理問題。

地利方面，由今年開始，各條政府隧道將逐步實施不停車繳費系統，除咗令到車輛喺過隧道時毋須停車繳費，行車更為暢順，更重要係使到政府有條件推行「不同時段、不同收費」。通過價格上嘅差異，喺一早一晚嘅繁忙時段收貴啲，其他時間收平啲，喺凌晨至清晨時分可以再平一啲，希望將部分繁忙時段嘅過海車輛分流到非繁忙時段，進一步減少出現塞車嘅時間同情況。

對於「不同時段、不同收費」，多位議員都質疑點解要等到年尾先實施，而唔喺收回西隧時同步實施。政府解釋，希望市民有時間適應新嘅收費安排同水平，運輸署亦有幾個月嘅時間，收集新收費之下三隧嘅實際車流量數據，以幫助決定「不同時段、不同收費」嘅實施詳情。對此我係表示理解嘅，但亦希望政府唔好拖延，否則會削弱咗新收費制度嘅成效，令到市民覺得紅隧同東隧加咗價之後，過海交通似乎一樣都係咁塞。

人和方面，隨着完善選舉制度嘅有效落實，立法會現已回復理性，以事論事，唔再事事政治化同民粹化，令隧道費嘅調整有望通過。當然亦會有人質疑，立法會批准紅隧同東隧加價，係咪新制度下嘅議會冇好好咁幫市民把關。就此我想指出，今次調整唔係剩係加價嘅，喺「不同時段、不同收費」實施後，每日嘅大部分時間，三隧嘅收費水平都畀依家低咗。即使喺正常行車時段，西隧收費亦都係平咗嘅。

此外，唔少市民喺討論三隧收費時候都忽略咗，即使隧道費收得好平，但如果成日都塞車，乘客花多咗嘅時間、行車用多咗嘅油錢、車輛要排隊同兜路所造成嘅碳排放同空氣污染、對香港經濟同市民健康都會造成嘅影響。呢個亦係我支持今次調整嘅其中一個主要原因。

對於草案建議嘅「六三三」方案，即係喺正常行車時段西隧一程收60蚊，紅隧同東隧收30蚊，社會係有唔同意見嘅。有人認為三隧應劃一收費，等駕車人士可以視乎自己需要同實際交通情況，嚟決定用邊條隧道過海，完全唔需要考慮收費高低。亦有部分人認為，依家經濟啱啱先開始復甦，通脹重臨，百物騰貴，無論係紅隧、東隧、西隧，收費都只應減，不應加。

就此，政府係有必要更清晰咁向公眾講清楚，今次調整唔單止係想做到三隧分流，而係希望通過整調收費，嚟減少整體嘅過海車流量。尤其係道路使用效益偏低嘅私家車，要鼓勵駕車人士非必要就唔好揀喺繁忙時間過海，或者採用公共交通工具。另外，紅隧同東隧嘅收費，亦已有差不多20年冇調整過。有限度嘅加費，某程度只係追番過去廿年來嘅累積通脹率，而且喺非繁忙時段會再收平啲，我覺得並非唔合理。

當然我亦認同，要有效紓緩過海交通，香港整體嘅塞車問題，唔能夠單靠調整隧道收費。第一係要完善交通及道路規劃，運輸署、路政署、規劃署，以及其他相關部門要加強溝通協調，避免香港嘅交通管理、道路建設、同城市規劃，好似過往咁各自為政，互不配合，削弱各種措施嘅對交通嘅成果，同運輸基建嘅效益。

多年前我當選立法會議員後，已要求政府研究興建第四條過海隧道。政府最近話已經做緊，就係將來由新界西駁落中部水域人工島，再接去港島西部嘅跨海行車幹道。呢條過海隧道嘅好處係唔使經過九龍，直接駁通新界同港島，但講下講下又幾年嘞，市民都唔知幾時先至用到。我希望政府真係做到提速提效，基建先行，創造容量。

第二係要善用中水人工島同北部都會區嘅發展機遇，紓緩香港嘅南北地區職住失衡問題，從根本上減少市民跨區上落班產生嘅交通流量。政府計劃喺人工島建設第三個核心商業區，喺北部都會區大力發展創科產業，但如果同時又維持公私營房屋嘅七三比例，會否造成職住錯配，增加大量非必要嘅跨區同過海交通需求呢？

第三係要加強執法。香港部分路道經常擠塞，往往唔係因為太多車喺路上行使，而係太多車喺路邊違泊；雙黃線形同虛設，4線泊到變成1線行車，想唔塞車都幾難。當亂拋垃圾罰款加到3千元，阻街罰款加到6千元，點解違例泊車只係罰幾百蚊呢？

同時，政府係咪可以善用創新科技，以加強交通違例執法。泊車位唔夠係事實，但唔係違法嘅藉口。私隱更加係唔成理由，犯咗法就要面對後果。希望政府唔好遇難避事，要更加積極、切實、多管齊下咁去解決香港嘅塞車同交通問題。

本人謹此陳詞，支持草案二讀。