《2023年行車隧道(政府)(修訂)條例草案》全委會階段發言

主席，剛剛通過二讀嘅《2023年行車隧道(政府)(修訂)條例草案》，係希望透過調整三條過海隧道喺繁忙時段嘅收費水平，以及實施「不同時段，不同收費」模式，將部分過海車輛、尤其係私家車，分流到非繁忙時段，從而紓緩過海塞車問題。

不過，對於商用車輛，例如的士、貨車同客貨車等，「不同時段，不同收費」，可能會增加佢哋同客戶之間嘅爭拗，因此草案建議商用車不論係喺乜嘢時段，以及行邊條隧道過海，都係採取劃一收費。當中的士係建議一律收每程25蚊，其他商用車就收每程50蚊。

據了解，的士業界普遍係接受有關收費建議，雖然相對於現時行紅隧每程只收10蚊，將來乘客要畀多15蚊，但如果行西隧就會平咗成45蚊。須知大部分的士司機都鍾意行西隧，因為冇咁塞，慳到嘅時間有機會走多轉車，增加收入。我希望隨着隧道收費劃一咗，將來會有更乘客選擇行西隧，令紅隧冇咁塞。

對於其他商用車，包括小巴、巴士同各類貨車，新收費就有辣有唔辣。行紅隧會貴咗，行西隧會平咗，行東隧則有加亦有減，視乎係乜嘢車種，業界因此亦有不同意見。

易志明議員嘅修正案，原本係建議將所有商用車，無論係的士、巴士，定係貨車，無論係行邊條隧道，都一律只收20元。相關業界當然係支持嘅，因為冇人會鍾意畀多啲錢，但係咪合理又係另一回事。尤其喺繁忙時段，當三條隧道都已經好塞，當私家車過海都最少要收30蚊或者更高，商用車只收20蚊似乎係講唔過去。至於政府建議一律收50蚊，係咪最佳嘅水平呢？就有待實踐去證明。

再者，由於涉及《基本法》第74條對議員議案嘅限制，現時易議員嘅修正案，變成只係修改紅隧同西隧嘅商用車收費，東隧就跟番政府嘅原建議。有關修正案一旦獲得通過，就會變成東隧嘅商用車收費，特別貴過其餘兩條過海隧道，令到部分本應經東隧往返港島東同九龍東嘅商用車，可能會兜路轉行紅隧，造成不必要嘅擠塞，與整條草案嘅原意，以至易議員嘅原本希望達到嘅目的，都係背道而馳，所以我同G19都唔會支持易議員嘅修正案。

本人謹此陳詞。