《2023年道路交通法例(提升個人化點對點交通服務)(修訂)條例草案》修正案發言

主席，本條例草案，除咗嘗試為香港引入「車隊的士」制度，亦建議就4項有關的士司機嘅較嚴重罪行，包括濫收車資、拒載、兜路及干擾的士咪錶，引入兩級制罰則，即係提高屢次干犯相關罪行嘅最高罰款額同監禁刑期。有關建議係得到社會各界支持，以加強打擊行內嘅害群之馬，杜絕「黑的」劏客行為，從而改善的士行業嘅整體形象同服務質素。

草案亦同時建議，提高利用汽車作非法出租或取酬載客嘅罰則，包括增加初犯同再犯嘅最高罰款額，以及延長將涉案車輛扣押或停牌嘅期限，以加強打擊非法白牌車活動。業界係支持提高違法罰則嘅，但質疑點解只係加罰款額同扣車期限，唔係好似打擊「黑的」咁，同時調高白牌車司機罪行嘅最高監禁刑期，令人感到不公。

我認同政府指出，草案建議延長扣車期限，應係最有效阻嚇車主將車輛用作非法出租或取酬載客。但對於業界要求將違法嘅司機監禁刑期一併提高，即係初犯最高可判監6個月，再犯最高可判12個月，我亦睇唔到有乜嘢壞處。一來有關刑期只係最高罰則，法官有權根據唔同案件嘅實際情況而唔判咁重。二來係只要車主同司機唔以身試法，就根本毋須擔心會罰得幾重。

所以，對於政府最後聽取咗業界意見，採納咗易志明議員嘅建議提出修正案，係從善如流嘅做法，值得支持。

不過，對於陸頌雄議員提出修正案，建議喺法例中訂明，「的士車隊」最少有50%嘅司機，必須同的士車隊經營者維持僱傭關係；以及「的士車隊」最少有5%嘅的士車輛，必須由車隊經營者擁有；我係有頗大保留。

首先，政府建議「的士車隊」只須與最少10%嘅司機維持僱傭關系，以及只須有10%或30架的士為經營者所擁有，係經過廣泛諮詢與討論，平衡咗各種因素而得出嘅，亦得到唔少業界同議員支持，係有理有據嘅。其次係有關百分比要求，政府建議只會寫落發牌條款，唔會寫入法例裡面，以便將來根據實際情況同營運經驗而作出調整，增加彈性。

陸議員建議規定「的士車隊」最少要有一半司機，必須同經營者維持僱傭關係，會否係過於從保障勞工角度出發，冇顧及到實際市場同經營情況呢？會否導致「的士車隊」變得難以經營，達唔到草案希望引入車隊式經營，從而提升香港整體的士服務水平嘅目標呢？

政府建議嘅10%只係最低要求，如對實際營運有禆期益，我相信「的士車隊」經營者一定會同更多司機訂立僱傭關係。基於以上原因，我同G19議員會反對陸議員嘅修正案。本人謹此陳詞。