《2023年道路交通法例(提升個人化點對點交通服務)(修訂)條例草案》二讀發言

主席，就現時香港嘅的士服務，好多市民都好有意見。除咗一少撮司機嘅濫收車資、拒載、及兜路等違法行為，部分司機嘅駕駛態度、同待客之道都係有問題。有啲司機短途嘅唔載，過海嘅又唔去，唔識路又唔用導航。亦有唔少司機，好似邱達根議員指出，到依家都只肯收現金，但要佢找贖時，往往又話唔夠現金。

香港的士嘅收費平過好多外國大城市，問題係需要用車時成日截唔到車。有時見到周街都係的士，但好多都冚晒旗，唔知佢哋係真正暫停載客，定係其實喺度揀緊客，令好多市民都一肚氣。

不過，我都同一啲的士業界團體，包括車行、車主同司機嘅代表討論過，明白佢哋亦面對唔少困難同掣肘。其中一點係話運輸署規管好嚴，尤其係審批加價，往往一搞就起碼一兩年，令到的士收費水平與其他公交服務嘅差距縮窄，因而出現供不應求。的士收費偏低，亦導致難以吸引新血入行，令到司機出現人手短缺同高齡化，間接影響道路安全。

政府訂立《競爭法》，原意係促使各行各業內嘅不同營運者，收費同服務會有所差異，通過競爭嚟提升服務水平，亦讓到消費者有所選擇。但對於的士服務，政府卻嚴格限制佢哋出現收費差異。市民想畀多啲錢，享受更舒適、優質、同個人化嘅點對點交通服務，就唯有幫襯網約車同白牌車。有關服務一係就非法，一係就不受現行法例監管，對受到嚴格監管嘅的士服務，係咪構成咗不公平競爭，打擊奉公守法嘅司機生計，同時令到整個行業嘅發展雪上加霜呢？

當然，香港嘅的士服務近年出現種種問題，唔係單單因為司機年紀大或業內有個別嘅害群之馬，而係整個制度出咗問題，追唔上市民嘅乘車習慣轉變同科技嘅日新月異。所以我喺上屆立法會任期，已經要求政府全面檢討的士服務嘅定位，作出更根本性嘅改革。

主席，內地城市嘅的士服務，佢哋叫「出租車」服務，喺十多年前亦係存在好多問題，包括經常唔按錶收費、車身殘舊、司機態度非常惡劣，所以好多香港人都唔敢搭。但經過當局大刀闊斧改革，包括引入車隊式、集團式經營，強制淘汰舊車；仲有係善用創新科技，規定的士要安裝導航同電子支付系統，再加上網約平台興起，配合政府嘅有效規管；依家香港人喺內地坐的士，唔單止安心，而且一叫車就知道幾時會到達，未上車已知道車資係幾多，落咗車仲可以為司機嘅服務提供評分。

除咗引入車隊式經營，部分內地城市亦容許有不同收費層級嘅出租車服務。我早前都內地坐過呢類貴價出租車，車廂寬敞，座位舒適，司機態度殷勤，行車時仲可以揀鍾意嘅音樂、大細聲收聽，令乘客覺得畀多少少錢都物有所值。

上屆特區政府提出最初叫做「優質的士」，其後改稱「專營的士」嘅新制度，改革方向都係引入車隊式經營，容許有收費高一啲嘅的士服務。但因為部分議員同業界對方案有唔同意見，認為有啲唔完善嘅地方，有關立法建議最後未能獲得支持。

今日恢復二讀嘅條例草案，某程度係當年嘅「專營的士」方案嘅改良版。透過引入「車隊的士」制度，為市民提供更優質、多元化、同個人化嘅點對點交通服務。乘客可以經電話或網上預約「車隊的士」服務，而且可以選擇唔按咪錶收費，事前直接同營運者議價，事後亦可以對有關服務作出評價，使到營運者掌握到顧客對個別司機表現、同車隊整體服務嘅意見，從而可以跟進及改善。

「車隊的士」唔止方便到乘客，對車主同司機亦係有好處。包括以後可以合法咁喺繁忙時間，以至針對短途乘客收貴啲，冇乜乘客時亦可以收平啲，仲可以提供不同嘅增值服務，賺取更多收入。草案亦鼓勵現有嘅「單頭」的士車主同中小型車行，聯合起嚟申請「的士車隊」牌照，發揮規模經濟效應，而唔會好似之前嘅「專營的士」方案咁，好似想趕絕啲「單頭」車主同細車行。

除咗引入「車隊的士」，草案亦建議將的士嘅最高乘客座位，由現時嘅5個增加至6個，以回應市場同乘客嘅需求，尤其是係輪椅使用者，從而提升的士行業嘅競爭力，所以我都係支持嘅。

主席，引入「車隊的士」制度係有唔少好處，但將來路面上可能會多咗好多唔同顏色、唔同車種、隷屬唔同車隊嘅的士。佢哋安裝的士展示燈同咪錶嘅位置亦可能唔同，或者會令市民，尤其係遊客產生混亂，政府要做好相關嘅規定同宣傳工作。特別係當啲「車隊的士」冚咗旗，展示「暫停載客」嘅時候，究竟部車係畀人預約咗去接載乘客，定係其實喺度揀客，市民、旅客同相關執法人員係真好難分辨嘅。

就此，我同多位議員都建議政府參考外國做法，規定的士要喺當眼位置，清楚展示當時到底係「暫停載客」、「前往接載乘客」，定係可以為街上嘅市民提供服務，等大家都更加清晰，減少爭拗同投訴。希望政府認真考慮，從速實施，提升的士嘅服務質素。本人謹此陳詞，支持條例草案二讀。