「中國歷史列為高中必修科目」議案

主席，我係讀理科、工科出身嘅，但對於中國歷史亦較有興趣。第一係作為中國人，應該多認識自己國家嘅歷史。第二係好多中史內容都好有故事性，例如係春秋五霸、戰國七雄、秦國統一、三國鼎立、鴉片戰爭、八國聯軍、八年抗戰等等，內容都係有血有淚，有情有義嘅。對個人成長、愛國情懷，以至係道德修養方面，都有一定影響嘅深遠。

因此，對於劉智鵬議員嘅議案提出，要加強香港中學生嘅中史教育，以培養佢哋嘅國家觀念、民族感情及國民身份認同，呢啲大原則我係支持嘅。但對於將中史科列為高中嘅必修、必考科目，我就有幾大保留。

首先，現時中史喺初中已係必修科，小學常識科亦已加入咗唔少中史內容。去到高中階段，學生嘅心智、思想已成長到一個程度，透過必修、必考嚟逼使佢哋認識中史，係咪最有效嘅方法呢？會唔會有反效果呢？

再者，整個新高中課程改革，目標之一係應該減少學生修讀同應考嘅科目，等佢哋學習得輕鬆啲、開心啲，就一般6至7科嘅必修加選修科讀得好啲、深入啲。再加多一科中史，變成5科必修科，加加埋埋又變番以前中學會考咁，要考成8、9科，係咪有違當年改革嘅初心呢？

要加深高中生對中史嘅認識，其實仲有好多其他方法。例如去年開始推行嘅「公民與社會發展科」，糾正咗以往「通識科」欠缺指定教材，任由老師決定點樣教，往往只重批判呢啲問題。但同時亦有家長反映，「公社科」嘅課程同教材過於沉悶死板，叫學生背完《基本法》就背《憲法》，背完《憲法》就再背《國安法》，教學方法唔夠生動有趣，最後反而令學生失去興趣。

如果能夠將部分中史內容，融入公社科嘅教學，透過歷史故事同人物，教曉學生國家安全、社會穩定同祖國統一嘅重要性，相信會事半功倍。但前提係要有足夠、優質、同可以信賴嘅教材與師資，否則無論係教通識科、公社科定係中史科，最後都可能會變咗型，走咗樣。呢樣正係香港過往比較缺乏嘅，一旦將中史列為高中必修科，教材同師資嘅問題就更加突出。

最後係要正視近年愈嚟愈少高中生選修中史科嘅問題。原因係比較複雜嘅，包括香港社會嘅重商輕史氛圍、學生普遍嘅中文水平下滑，仲有係過去一段時間嘅西方抹黑同政治事件、近年嘅海外升學潮等，都削弱咗學生選修中史科嘅意欲。

主席，我唔係呢方面嘅專家，希望教育局同教育界嘅專家可以對症下藥，扭轉呢個趨勢，但係唔應該因為諗唔到其他辦法，就不如將中史科列做必修必考，逼啲學生同家長硬哽。所以我會支持由管浩鳴議員提出嘅修正案，以及經管議員修正後嘅議案。本人謹此陳詞。