「完善外籍家庭傭工政策」辯論

主席，外籍家庭傭工，已成為唔少香港家庭不可缺少嘅一員，佢哋幫手打埋家頭細務、湊小朋友、照顧老人家等，使到佢哋嘅僱主，尤其係女僱主，可以出嚟做嘢賺錢，貢獻社會。因此，穩定、良好嘅外傭供應同服務，對於改善唔少家庭嘅生活質素，增加整體勞動力，促進經濟發展都好重要。

香港嘅外傭人數高達40萬人，佔整體勞動力超過1成。外傭現時嘅最低工資係每月4700多元，按時薪計，遠遠低於本地嘅法定最低工資。但即使係一啲最講究勞工權利嘅議員同工會人士，我都好少聽到佢哋會話，要限制輸入外傭嘅人數，減少佢哋嘅工作時數，又或者話要將外傭嘅最低工資，提高至與本地勞工嘅法定最低工資同等水平。

因為我相信大家都知道，咁做法係唔實際嘅，即使係提升薪金至高於法定最低工資，都好難搵到足夠本地人士從事家務工作。結果只會導致好多家庭主婦，因為冇「姐姐」幫手而無法外出工作，令佢哋嘅家庭收入減少，生活質素下降，整體勞動力亦都少咗。因此，對於顏汶羽議員提出嘅原議案，以及兩位議員嘅修正案，促請政府完善外傭政策同相關嘅中介制度，加強保障僱傭雙方嘅權益，我原則上係支持嘅。

除咗外傭政策，我認為香港整個輸入外勞政策都需要檢討，需要完善。有啲勞工界人士成日話，輸入外勞會搶走本地工人嘅飯碗，對於某啲工種可能有影響，但對於已經出現嚴重人手短缺，出更高人工都冇辦法令到本地人願意做嘅行業，尤其係好多青年人都唔想入行嘅工作，適度、規範化咁輸入外勞，對於改善本地經濟同民生發展，都會起到正面嘅作用。

外籍家庭僱工係好嘅例子，另一個例子係安老同殘疾院舍嘅護理人員。同家庭傭工一樣，都係好少本地人肯做，但隨着香港人口老化，服務需求有增無減。新冠疫情進一步凸顯院舍人手不足嘅嚴重性，嚟緊政府仲會修例提升院舍嘅人手比例。因此，我認為更有需要加大、加快輸入院舍護理人員，更好咁照顧我哋嘅長者，以及釋放相關家庭嘅勞動力。

建造業議會上周公布最新嘅《建造業人力預測報告》，預計隨着香港嘅公私營工程量持續未有減少，業界無論係前線嘅建築工人、中層嘅技術員，以至工地監督同專業人員方面，未來幾年都會有不同程度嘅短缺，對各類建屋及發展建設項目嘅施工時間、成本造價、工程質量同工業安全等，估計都會造成影響。

我希望各界能以同一套標準，理性、務實咁，考慮建造業界希望擴大輸入外勞嘅訴求，以落實「七一講話」強調嘅「不斷增強發展動能」，做到今屆政府提出嘅「提速、提效、提量、提質」建屋目標。主席，本人謹此陳詞。