「全面推動產業升級轉型，促進金融、經濟多元發展」議案

主席，感謝李惟宏議員提出「全面推動產業升級轉型，促進金融、經濟多元發展」議案。議案頭兩點聚焦香港金融業發展，相信G19唔少熟悉財經、金融嘅議員會提出佢哋嘅真知灼見，我會集中回應議案嘅第三同第四點。

第三點係「促進科研成果商品化和產業化，鼓勵業界運用科研產品和服務，以提升創新科技在各行各業的應用場景，推動不同產業升級轉型」。香港建造業面對嚴重人手短缺，應對方法之一係善用創新科技，減少對人力嘅需求。我哋早前去到大灣區內地城市考察，睇到好多由我國自行研發嘅建築機械人，結合咗AI、BIM同MiC等多種技術，以更自動化方式起樓同裝修。除咗節省人力，亦慳到施工時間同建造成本，令工程質量更為穩定，仲可以減少工業意外，一舉多得。

不過，根據過往經驗，香港想引進內地嘅先進科技同設施，往往係困難重重。原因之一，係過去立法會嘅攬炒派，對於所有來自我哋國家嘅事物，都惡意批評、排斥同阻礙，將所有內地嘅產品、技術、企業、以至專才，都一律抹黑為次一等嘅，只有來自外國嘅先至係好嘢。

部分特區官員喺呢個政治環境之下，亦變得對內地嘅產品同技術有所抗拒，例如唔會輕易承認我哋國家自己訂立嘅產品同技術標準，即係「國標」；或者要求有關公司進行更多喺內地已做過嘅測試；甚或要求取得外國認證等等，令到需要花更多時間同資源先能取得批准，費時失事，令人氣餒。

其二係採購及招標制度。為咗保障本地嘅勞工同企業，好多政府採購合約，都規定中標者必須聘用相當高比例嘅本地僱員。一般而言，呢啲係合理嘅做法，但對於一啲創新科技項目，一啲本港相關技術及專才供應不足嘅有關項目，承辦商希望引入較多外援，以提供更佳嘅服務，相關規定就未提供到彈性，我建議係應作檢討。

第四點係要求政府「制訂戰略性新興產業的發展藍圖」，包括透過提供稅務優惠、專項資助、人才培訓、以至上市融資等配套支援，從而促進經濟多元。呢幾點都係重要嘅，我建議再加多一樣，就係土地規劃同批給政策。

主席，基於所謂嘅「積極不干預」嘅政策、部分官員嘅唔做唔錯心態、仲有攬炒派嘅「官商勾結」抹黑，政府過去甚少積極、主動咁透過土地規劃同批給，去推動一啲有利香港嘅產業發展。結果令到好多企業同產業，搵唔到足夠同合適嘅用地，或者要花好多時間同資源先搵到。政府嘅短期租約用地，租期一般只得兩三年，亦令到企業唔敢放膽投資。

對於上述嘅審批認證、招標制度及產業用地政策問題，希望政府會正視同檢討。措施要適度靈活變通，否則香港嘅科技應用同產業發展，將永遠都落後於他人。本人謹此陳詞，支持原議案同修正案。