《2023年應課稅品(修訂)條例草案》二讀發言

主席，政府近年面對巨大財赤，估計短期內難以逆轉，因此本人喺今年提交畀財爺嘅預算案建議書，提出咗多項開源節流建議。其中一項係大幅度調高煙草稅，目的除咗增加庫房收入，亦係為市民嘅健康着想，包括促使現有嘅煙民戒煙；阻嚇啲非煙民染上煙癮，尤其係青少年；少咗人食煙，亦有助減少因吸煙或二手煙引發嘅疾病，以及長遠減輕相關嘅公共醫療開支。

今日恢復二讀嘅《2023年應課稅品(修訂)條例草案》，目的就係落實2023/24年度預算案提出嘅調高煙草稅建議。加幅係每1支煙加6毫子，增幅為31.5%，聽落好似都唔少，但同2009年增加50%，以及2011年調高41.5%比較，今次加幅係相對比較溫和。

如果以每包20支煙計，增加咗12蚊稅款，喺茶餐廳飲杯咖啡隨時都唔止。加咗稅之後，香港每包煙大約係70至80蚊，仍然低過好多先進國家同地區。唔少煙民都話今次加稅嘅阻嚇力唔大，認為最少要加到100蚊一包，佢哋先考慮戒煙，不過依家都可能會食少幾枝。

加煙稅係咪能有效降低吸煙率，除咗要睇加幅，亦要睇埋當局打擊私煙活動嘅力度同成效。唔少人都擔心，加稅只會令更多煙民流向私煙市場，未能有效促使佢哋戒煙或食少啲煙。私煙問題除咗會影響政府稅收同削弱加稅嘅成效，亦變相為不法分子增加咗收入來源，因此當局係有必要加緊打擊私煙。

喺草案委員會審議期間，我特別關注到，政府有冇針對市民購買私煙而執法。因為似乎有唔少煙民，即使佢哋知道購買私煙其實係犯法嘅，但就唔覺得係乜嘢一回事，因為好少會畀人捉到，即使捉到亦都罰得唔重。

海關強調，不論係販賣定係購買私煙，佢哋都一直有執法，單計去年就有2800人因買私煙而被捕。但其實當中超過2100人都係喺入境香港時捉到，交完罰款就冇事，非入境嘅被捕人數去年約有700人。但有唔少人都講，私煙喺香港已賣到成行成市，如當局從嚴執法，應唔止咁少人被拘控。

加煙稅嘅另一個副作用，係對報販生計嘅影響。我喺預算案審議前見咗一批報販代表，佢哋都話知道吸煙危害健康，有得揀佢哋都唔想賣煙。問題係食環署對佢哋業務規管得好嚴，只能販賣約10種指定貨品。隨着智能手機普及化，愈嚟愈少會購買實體嘅報紙同書刊。其餘幾種容許售賣嘅貨品唔係已經過時就係根本賺唔到錢，想利用個報攤幫人賣下廣告，亦有相當多嘅限制。結果逼使佢哋愈嚟愈依賴賣煙維生，每次加煙稅都對佢哋嘅生計造成打擊。

就此我已去信食環署長，轉達報販業界嘅意見同訴求，尤其係喺協助佢哋活化、轉型方面。喺草案委員會會議中我亦有再次反映，但當局嘅答覆都係好似好官腔。我認為如果政府認為隨着時代轉變，報販呢個行業經已冇存在價值，就不如同大家講清楚，想辦法協助佢哋轉行。如果當局認為報販同報攤，係值得保留嘅，就應該提出積極、有效嘅措施，協助想繼續做落去嘅報販改善營運，做到民有所呼，我有所應。

主席，雖然今次加煙稅嘅幅度未能達到我所建議，但我都會支持嘅，因為始終係加好過唔加。而正如多位議員同事，以及吸煙與健康委員會指出，要有效減少香港嘅吸煙人口，加快達致政府訂出嘅7.8%吸煙率，以至實現「無煙城市」嘅最終目標，單靠加稅係唔夠嘅，必須多管齊下咁去做，包括加強教育宣傳同戒煙服務，甚至效法外國以立法方式，禁止喺某個年份後出世嘅市民吸煙等等。

政府表示會喺今年上半年，就下一步嘅控煙工作展開公眾諮詢，當中會就我一直倡議嘅「指定吸煙區」政策作出交代。

主席，政府喺過去十多年，先後將所室內食肆同工作場所、郊野公園、海灘同公共交通交匯處等，列為法定嘅禁煙區，以減少非煙民吸入二手煙嘅機會。有關做法係起到一定成效，但同時亦令到某啲地方，例如食肆、商場嘅出入口，工廠大廈同寫字樓嘅後巷、以至路邊嘅垃圾桶側邊，都經常性、密集性咁，有大量煙民吸煙，對行經嘅途人、唔食煙嘅顧客造成滋擾，亦係有礙市容同影響衞生。

我喺早幾年就提出，香港可以效法某啲海外國家同地區，將禁煙區政策改為「吸煙區政策」。即係市民只可以喺政府指定、劃定嘅公共地方公開吸煙，其他所有公眾地方一律全部禁煙。咁樣除咗可以減少市民吸入二手煙，改善市容同環境衞生，仲可以透過增加搵地方食煙嘅難度，嚟促使更多煙民食少啲、甚至完全戒煙。尤其依家煙民與非煙民嘅比例已跌至大約1比9，冇理由要佔大多數嘅非煙民，喺公眾地方承受只佔少數嘅煙民所造成嘅健康禍害。

我明白政府擔心，係咪可以喺市面搵到足夠同合適嘅指定吸煙區。如果啲指定吸煙區太密同太近民居，無時無刻都有大堆煙民喺度煲煙，所造成嘅滋擾可能比現時更大。但如果啲吸煙區設得太少同太唔方便，又可能就會增加煙民喺區外違法吸煙嘅機會。我認同喺某啲舊區係有難度嘅，但喺一啲新發展區，例如位於北部都會區嘅多個新市鎮，如果一早喺規劃同設計已諗定，就唔難做得到。

主席，我希望官員唔好遇難避事，對市民係好嘅，就要有承擔咁去做。本人謹此陳詞，支持草案二讀同三讀。