「全面推動香港氫能源產業發展」議案

主席，香港同多個地區近年都大力推動電動車，希望逐步取締相對冇咁環保嘅燃油車，以減低碳排放量。而議案提及嘅氫能源，就可以做到接近零排放。同時，相對於現時應用嘅另一種零碳能源，必須取得某啲稀有礦物才能生產嘅核能，氫係可以喺水同其他自然物質中取得，亦唔會產生大量有毒廢料，理論上應該會更平、更可持續。近年氫能電池同相關轉化設施，體積仲愈做愈細，安全度同可靠性大大提高，可以應用喺巴士、私家車等不同交通工具身上。

不過，就好似推動電動車一樣，技術上可行，理論上可帶嚟好處，但往往因為相關嘅產業供應鏈同配套未能跟上，導致未能適時達致應有嘅成果同普及化嘅應用，希望今屆政府可以糾正有關短板。

國家喺去年發布《氫能產業發展中長期規劃(2021-2035年)》，目標係喺2025年，即係兩年之後，做到掌握相關核心技術同製造，同初步建立較完整嘅供應鏈同產業體系；到2030年，就要做到合理、有序嘅產業布局，使到可再生能源製氫廣泛應用，尤其喺交通運輸層面；到咗2035年，更希望將氫能應用喺航天科技，以及其他不同範疇嘅工業領域，逐步取代各類較高碳排嘅燃料同產能方法。

香港嘅科研水平係相當高嘅，但可惜市場細，地方細，好難獨自開發整套氫能供應鏈同產業體系，不過咁唔代表我哋就乜都唔做。過去有部分特區官員，唔知係純粹小心謹慎，定係欠缺積極性同動力，對於一啲新科技、新事物，往往都有所抗拒或欠缺主動跟進，希望等到其他地區嘅技術、產業同監管制度成熟之後，香港就可以照跟。

結果不但造成香港嘅科技喺應用方面未能善加推動，而落後於人，不少內地或外國嘅新產品、新技術，喺香港應用時往往先發現未能符合相關法規同標準，需要臨急臨忙修例同研發適用於香港嘅版本，浪費咗好多時間同商機。

例如剛才亦議員同事提到，香港有巴士公司，早喺一年前引入首部氫能雙層巴士，但礙於政府嘅法規同審批問題，一直都做唔到喺路上測試。今年預算案提出會資助購買氫能巴士，只係講緊幾部車，未能配合巴士公司原本希望喺今年投入量產嘅計劃。咁嘅速度，咁嘅態度，今時今日係唔可以接受。不然，隨時內地成功將氫能應用喺航天工程，香港嘅氫能巴士仲未可以喺路上廣泛行走同使用。

所以，對於G19嘅李浩然議員今日提出嘅議案，要求政府全面推動香港嘅氫能源產業發展，包括展開相關研究、制訂產業發展規劃、進行碳指標認證評級，以及積極推動碳排放交易同碳金融等等，我都係十分支持。希望政府除咗覓地建屋，喺推動綠色能源、環保減碳方面，都可以做到提速、提效、提量。本人謹此陳詞。