「加快實踐『健康城市』目標」議案主體發言

主席，今次係我喺本屆任期嘅第二項議員動議，主題係「加快實踐『健康城市』目標」。點解話要「加快實踐」呢？因為目標一早已有，亦獲得社會支持，但落實得好慢、好零散、好被動。

世界衞生組織喺幾十年前，已經提出「健康城市」嘅理念，希望促進健康嘅人群、健康嘅環境、健康嘅社會，並且將佢哋有機結合，不斷改進，讓城市發揮最大嘅潛能。香港首個「健康城市計劃」，亦早喺1997年已經制訂，衞生署喺2007年再發表《在香港推展健康城市計劃的指引》，建議從醫、食、住、行等多個層面，將香港建設成一個健康城市。

15年後嘅今日，有關計劃同指引，有冇落實到呢？港人嘅身心健康係咪改善咗呢？過去幾日我喺社交網站，就健康城市建設進行簡單嘅民調，其中一條問題係：「你覺得香港依家算唔算係『健康城市』？」結果有近77%嘅網民話「唔算」，反映政府有關工作頗為失敗。

我哋國家喺2017年提出「健康中國」嘅發展戰略，起步係比香港起碼遲咗10年，但內地當局講出得，做得快，尤其係經歷新冠疫情，內地嘅健康城市規劃、建築設計、生活出行、醫療同保健服務、市民嘅飲食同運動習慣，仲有與健康相關嘅科技應用方面，作出咗好大嘅改進。喺香港，簡單如紅黃綠健康碼，慢到離晒大譜，講咗兩年都落實無期。

根據一項涵蓋內地18個城市嘅研究，落實健康城市有唔少好處，包括人均壽命可延長4年、傳染病感染率可大幅降低、GDP平均可提升20%，仲可以增加市民對政府嘅信任同滿意度；後者係香港近年最缺乏嘅，因此特區政府有必要加大力度、加快實踐「健康城市」嘅目標。

主席，我喺議案提出，政府要喺醫、食、住、行等4個方面作出配合，以加快實踐「健康城市」嘅目標。第1點嘅「醫」係「醫療」，政府先後提出咗兩個「十年醫院發展計劃」，預留咗最少4,700億元提升香港嘅醫院設施，但我之前已經指出，香港現時嘅醫療衞生政策，過份側重醫院設施同住院服務，忽略咗基層醫療同預防性嘅保健服務，做唔到中醫學所強調嘅「治未病」嘅理念。

18區嘅地區康健中心同公營嘅中醫診所，講咗咁多年，到依家都唔係區區都有，首間中醫醫院啱啱先開始動工。醫護人手不足嘅問題，亦係最近一、兩年政府先較為有決心去處理。香港嘅醫療衞生政策再唔進行根本性嘅改革，公營醫療服務同相關衞生福利開支，將會隨住人口老化而爆煲，唔少人更認為其實依家已爆晒煲。

第2點係「食」，政府過往嘅食物政策，主要係講食品嘅供應是否充足同安全，到近幾年先開始關注市民嘅飲食習慣係咪健康，但似乎只係針對食物中鹽同糖嘅份量。其實好多香港人、尤其係年輕人有不良飲食習慣，包括快食、夜食、偏食、暴飲暴食等，同吸煙、濫藥及酗酒都一樣，都係危害健康嘅，但唔見政府有做好宣傳教育或規管嘅工作，導致愈嚟愈多香港市民出現「三高」、過肥過重、以及各類腸胃及消化問題，容易引發更嚴重嘅疾病。

第3點係「住」，香港喺住嘅方面亦有「三高」，包括樓宇高、樓價高、仲有密度高。新冠疫情時候，充分凸顯香港嘅居住環境過於狹小擠迫，所引發嘅個人健康及公共衞生風險。

我代表嘅建測規園4個專業學會，喺過去呢兩年做咗多場有關疫情同健康城市建設嘅研討會，就整體城市規劃、樓宇建築設計、舊樓嘅渠管同通風嘅改善、舊區嘅更新同活化、綠化同公共空間嘅量與質、仲有與建築方法、採用物料同物業管理相關嘅創新科技研發應用等等，提出咗多項專業、可行、能夠有效提升香港防疫能力同市民健康嘅建議，尤其係適合喺「明日大嶼」同「北部都會區」等新發展區推行，時間關係我唔一一詳述嘞。

第4點係「行」，我提出要鼓勵綠色低碳運輸，減少廢氣同碳排放，但對市民嘅日常生活同身心健康嚟講，更重要嘅係有完善嘅交通規劃同設施。可惜香港多年來嘅交通基建嘅規劃，往往都係「以路為本」、「以車為本」、「工程主導」，而唔係「規劃主導」，做唔到「以人為本」。建成嘅道路係好安全、堅固，但行人嘅暢達性同舒適度往往被忽視，社區被間成一忽忽、一格格，暢達受阻，地面通道狹窄，廢氣充斥，唔好話想跑步同踩單車，有時連行幾步都有困難。

主席，正如我剛才指出，我哋建測規園及其他相關業界嘅專家，近年已就香港嘅健康城市建設作出咗不少研究同建議，關鍵係如何有效推動，從速落實。2007年嘅《健康城市指引》落實無期，原因之一係涉及多達22個局同部門，人人有責，最後就變成冇人負責。我喺2016年聯同跨界別嘅專家，就鼓勵長幼共融嘅建築設計及樓宇裝備發表研究報告，同樣係因為涉及不少於6個政策局及其下嘅多個部門，難以搵人牽頭推動，最後無疾而終。

新任特首李家超成立咗4個工作小組，處理一啲長期未能解決嘅房屋同民生問題，係咪可以成立多1個小組或者委員會，集合相關官員同業界專家，專責加快實踐「健康城市」呢個涵蓋面甚廣，但係非常重要嘅目標。希望政府拿出勇氣，迅速行動，以市民嘅生活及身心健康，作為施政嘅結果與目標。

主席，本人謹此陳詞，懇請議員支持我提出嘅議案。