「加快實踐『健康城市』目標」議案修正案發言

主席，以下係我對3項議員修正案嘅回應。首先感謝一共有39位議員就我嘅議案發言，提出咗好多寶貴嘅意見同建議。「健康城市」涉獵嘅範圍好廣，我希望在席嘅兩位局長，可以將呢啲咁好嘅意見，帶番去畀其他局同部門跟進。

主席，「健康城市」範圍係好闊嘅，除咗醫、食、住、行，市民嘅工作環境係咪健康都非常重要。郭偉强議員嘅修正案，建議「透過標準工時立法，讓在職人士得到工作與生活平衡」。作息有序，均衡、優質嘅家庭生活，係非常重要嘅，呢個我認同。

好似我代表嘅建測規園業界，近年亦面對日益嚴重嘅工時過長、工作與生活失衡嘅問題，加劇業界嘅人才流失，唔少年青人唔願意入行，或者做幾年就轉行。但佢哋所要求嘅，首要係要精簡相關嘅法規同審批流程，減少不必要嘅文書同程序工作，等佢哋可以將時間同精力集中做好專業工作，發揮所長。同時亦都要改革招標制度，讓業界可以取得與工作量同質素成正比嘅合理回報，多勞就真係可以多得，讓年輕人有向上流嘅機會。

透過立法手段嚟規管工時，唔單止複雜，亦都具爭議性，仲未必起到實際效果。香港有唔少行業同職位，包括一啲從事創作同專業服務業，佢工作嘅性質、成果同報酬等，都未必係與工作時數，或者係喺工作場所上班嘅時間有直接或好大關係。以建築設計為例，設計嘅優劣成績，並唔能夠以工時去衡量，而係以結果為目標，以質素賺取回報，因此對有關修正案，我係好難支持。

吳傑莊議員嘅修正案，提出要「善用創新科技和提供更大誘因，推廣體能活動，增添全民參與戶外活動的趣味和意欲」，我係支持嘅。喺早前另一項議案辯論，我建議當局善用建測規園專業，全面提升香港嘅公共空間設計同兒童遊樂設施，以促進佢哋身心健康發展。

除咗針對兒童、青少年同成年人嘅設施，香港需要有更多適合不同身體狀況嘅康體設施。只要環境安全、設施合適，過咗八十歲嘅長者都可以、亦應該做運動，對於減少病痛，促進佢哋嘅精神健康，我認為係有大嘅幫助。

至於我哋G19嘅同事，黃元山議員嘅修正案，提出要把市民嘅健康同幸福感，納入與醫、食、住、行相關部門嘅政策考慮；定期進行人口健康嘅調查；主動與地區人士同組織合作，以提高「健康城市」建設嘅民間參與度；以及增加醫療護理設施，緩解不同階層嘅醫療資源不均等等，我都係認同嘅。

我再次感謝一共39位議員就我嘅議案發言，希望兩位局長將有關意見，帶番去畀相關嘅政策局同部門。正如我剛才所講，「健康城市」涉及多達22個局同部門，希望政府做到我喺議案提出嘅，加快實踐「健康城市」嘅目標。本人謹此陳詞。