[:zh]「推動公共健康政策 享受優質老年生活」議案[:]

[:zh]主席，感謝陳健波議員提出嘅「推動公共健康政策、享受優質老年生活」議案。香港嘅人口老化問題、長者福利、長者醫療、安老及照顧等政策，本會已先後討論過唔少次。但好似今次議案所建議，積極、主動咁鼓勵市民，促使佢哋多做運動，多啲注重個人及公共健康，令佢哋可以享受健康、優質嘅老年生活，我印象中係第一次，亦係非常有見地嘅。

作為建測規園界嘅代表，我好早就思考如何從城市規劃、政策法規，以及建築設計等角度，去推動公共健康、鼓勵市民運動，讓長者享有更優質、健康嘅生活。

我喺2015年，聯同來自建測規園界、資訊科技界、以及熟悉安老工作嘅多位專家，成立「長者適切居所及相關配套研究工作小組」，就促進私人房屋發展提供長者適切居所及配套設施，提出咗多項建議。包括更新《香港規劃標準與準則》、修訂《城市規劃條例》、《建築物條例》及相關嘅指引守則，透過賣地條款同提供額外嘅樓面誘因等，去鼓勵發展商興建更多適合居家安老及長幼共融嘅住宅單位同環境。

推動長者友善嘅建築設計同配套設施係必須嘅，例如加闊一啲嘅門口、大一啲嘅洗手間、更方便輪椅使用者嘅走廊及電梯大堂、可以知悉長者活動狀況嘅智能家居系統等。

喺公共休憩及運動空間方面，依家好多新發展區都已做得唔錯，單車徑、緩步徑、海濱長廊、各類室內同室外嘅體育場館、針對不同年齡層嘅康樂及健身設施等。但最大問題係喺舊區，人多車多、路窄樓密，斜路、樓梯又多，行人路狹窄，又放置咗垃圾桶、電箱、巴士站、路牌標誌等，想行得從容啲都難，絕非對長者友善嘅設計，必須改善。

主席，有啲重建項目，想擴闊少少條行人路、拆走部分欄柵、移走某些公共設施，以便利市民步行以至跑步，但往往要經過多個部門分別審批。規劃署、路政署、運輸署、渠務署、食環署、康文署、消防處、環保署、機電工程署、仲有民政事務處等，令人眼花繚亂，有時部分部門仲會互相推莊、各自為政，令有關計劃被迫擱置，或者推行得好慢。

我當年提出嘅長者適切居所建議，就係因為涉及多個政策局與部門，結果冇人牽頭、冇人協調，就自然係不了了之，冇人跟進。今日陳健波議員嘅議案，亦係涉及唔止一個局與部門，希望今次政府會更積極、主動咁跟進，做到港澳辦主任夏寶龍強調嘅「勇擔當、敢碰硬、善作為、貼基層、接地氣」；要「善於為民眾辦實事」、「以施政業績取信於民」。

最後，香港市民想享有健康、優質嘅老年生活，遷往生活空間較大、但消費指數較低嘅大灣區內地城市居住，將會係另一個選擇，估計愈嚟愈受歡迎。希望政府加緊與廣東省及相關內地部門商討，推出更多便利港人到內地生活嘅政策措施。主席，本人僅此陳詞，支持議案。[:]