[:zh]「立法打擊網上虛假資訊」議案[:]

[:zh]主席，近日有政界人士，公開批評Facebook等社交媒體，未有努力阻止假資訊、假新聞嘅傳播，效果等同「殺人」！呢位人士並非特區政府官員，而係成日將言論自由、新聞自由掛在口邊嘅美國總統拜登。佢批評呢啲美國科網企業，任由一啲有關疫情同疫苗嘅虛假訊息，喺美國民眾之間廣泛流傳，影響防疫工作同疫苗接種率，令更多人感染病毒死亡。

諷刺嘅係，不少人均認為美國政府、美國反華嘅媒體，正正係最擅長製造同散播假新聞嘅，包括誣衊新疆出現種族滅絕行為，《港區國安法》破壞香港營商環境等，同當年指控伊拉克藏有大殺傷力武器一樣，目的都係為自己製造借口，藉此干預別國內政。

與美國同一鼻孔出氣嘅香港攬炒派，喺香港黑暴期間亦炮製咗好多假新聞、假資訊，目的係製造分化、挑動仇恨、抹黑政府、抹黑警察。當中最出名嘅包括「爆眼女」事件、新屋嶺警察性侵案、「八三一」太子站打死人等，講到似層層、有圖有相有證人，令到唔少市民，包括個別大學校長都信以為真。

依家大家都知道，「爆眼女」根本冇爆眼、新屋嶺冇發生過性侵案、太子站事件亦冇死過人，但相關假資訊對香港法治同秩序所造成嘅破壞、對政府及警隊形象所造成嘅損害，需要好長時間先至能挽回。有少數沉迷於網上黑暴世界嘅市民，包括唔少年輕人，至今仍對部分假新聞深信不疑，佢哋覺得外面嘅真實世界先係假嘅，政府講嘅每一句說話都不可信。呢啲人好容易諗埋一邊，被人利用，甚或自我激化，變成「孤狼」恐怖份子。

除着《港區國安法》嘅成功實施，令香港止暴制亂、由亂至治，相關黑暴假新聞已失去平台同市場，但取而代之係有關新冠疫情嘅假消息。包括指稱政府透過各類防疫措施嚟監控市民、盜取港人嘅出行以至基因資料，貶低國產疫苗嘅安全性等等。其目的同樣係製造恐慌、分化社會，削弱香港嘅防疫抗疫成效，令中港遲遲未能通關、經濟難以復甦、市民無法過番正常生活。簡而言之，佢哋就係想香港「攬炒」！

喺黑暴同疫情初期，政府對呢類假新聞好像袖手旁觀。到最近幾個月，政府喺澄清假資訊、發布真訊息方面有明顯改善，但係喺網上世界，往往係一百條真確無誤嘅訊息，都抵銷唔到一條假新聞所造成嘅影響。要證明一啲發生過嘅嘢真係有發生，未必會好難，但想證明一啲冇發生過嘅嘢真係冇發生，就係相當困難。

所以，對於葛珮帆議員今日提出嘅「立法打擊網上虛假資訊」議案，原則上我係支持嘅。事實上，好多聲稱好着重人權自由嘅國家，亦有林林種種嘅法律去打擊假資訊。當然，相關立法內容亦必須係清晰同相稱，喺打擊惡意虛假訊息、維護社會整體利益，以及喺保障新聞、言論同資訊自由之間取得平衡。本人僅此陳詞，支持議案。[:]