[:zh]「改革房屋政策，解決住屋問題」議案首輪發言[:]

[:zh]主席，國務院副總理韓正指出，香港嘅住房問題，有其歷史與發展過程，要解決嘅難度好大，但總要有開始解決嘅時候；如果一直未能形成共識，落實解決辦法不斷拖拉，最後損害嘅係老百姓嘅利益！立法會嘅拉布阻撓問題現已大致解決，特區政府再冇理由唔更有效率咁，解決香港嘅住屋問題。

作為建築、測量、都市規劃及園境界嘅立法會代表，我一向好關注香港嘅土地房屋問題。喺上屆議會，2013年我首個提出嘅議員議案，就係講居住問題，要求政府制訂「人均居住面積」及「住屋開支佔家庭收入比例」目標。好可惜，當時主理房屋政策嘅官員並冇採納我嘅建議，據悉係因為房屋供應量唔夠，政府唯一有做嘅，係喺其後嘅人口普查，首次開始統計港人嘅人均居住面積。

對於官員嘅有關理由，我係絕對唔認同嘅。要有效解決問題，一定要目標同指標，政府各部門先至能朝着既定目標同時間表，多管齊下，覓地建屋；做唔到就要解釋，甚至問責；否則部分官員同部門可能會慢慢做、HEA住做，希望政府會向市民交代每年計劃可提供幾多個房屋單位。

好失望，喺我嘅議案通過8年後嘅今天，香港嘅房屋供應，唔止喺量方面仍然短缺，好多市民仲愈住愈細、愈住愈貴，樓價比起2013年上升咗接近6成，納米樓同劏房問題愈趨普遍。唔少家庭要花上過半收入，用嚟供樓或交租，不但影響咗生活質素、加劇咗貧富差距，亦令到社會嘅怨氣不斷增加，引申唔少社會、政治，以至管治問題。

有鑑於此，我今日再次提出議案，促請政府全面改革香港嘅房屋政策，切實咁解決市民嘅住屋問題。

主席，我嘅第一項建議，仍然係要求政府制訂「人均居住面積」標準，讓港人「住大啲、住鬆啲」。《長遠房屋策略》只講單位數量，唔講面積大小，間接助長房屋單位「納米化」。現時出租公屋規定人均室內面積不少於7.5平方米，即約81平方尺，但對於私樓，政府就冇訂立有關標準。近年有啲納米樓，實用面積只得百多平方尺，但往往唔止住1個人。劏房嘅情況就更差，幾十呎嘅單位隨時住咗一家四口，連基本嘅生活空間都唔夠。

根據2016年嘅中期人口普查，香港嘅人均居住面積只有161呎，新加坡係323呎，啱啱係香港嘅兩倍，但新加坡嘅總陸地面積只得香港嘅六成半。反映香港嘅房屋問題，唔單純係因為冇地，而係因為政策唔到位、政府對港人嘅居住環境同質素缺乏目標所致。

我嘅第二項建議，亦係重複8年前嘅訴求，制訂「住屋開支佔家庭入息比例」目標。現屆政府採納咗我嘅建議，將資助出售房屋嘅售價，改為與市民入息掛勾，但對於私樓樓價同租金應佔住戶入息嘅比率，政府就全無政策目標。

每隔一段時間就有調查指，香港嘅樓價或住屋開支冠絕全球，根據最新推算係香港人要不吃不喝21年先至買到樓。政府嘅樓市「辣招」首次係2010年推出，之後多次「加辣」，到依家已經11年，臨時措施彷彿已變成永久政策，但期間樓價卻繼續上升，令唔少中產階層及專業人士都上唔到車、供唔起樓，或係變成「樓奴」。部分年輕人更對置業感到絕望，影響佢哋向上流嘅動力同對香港嘅歸屬感。

雖然政府有提供售價相對較低嘅資助出售房屋，協助中低收入家庭置業，種類方面亦較以往多元化，除咗居屋，仲有綠置居同首置盤，但數量係供不應求。另外，相關抽籤制度有唔少人覺得唔公平。有啲運氣欠佳嘅人，抽十次八次都抽唔中，希望變失望、失望變絕望。部分中產家庭亦唔合資格申請，但因為置業按揭成數低，畀唔起首期，買唔起私樓。

我嘅第三項建議，就係優化置業階梯，包括改革資助出售房屋嘅抽籤制度，畀嗰啲多次抽籤失利嘅申請者較高中籤機會，希望政府認真考慮。

第四項建議係檢討公屋富戶及寬敞戶政策，呢兩類租戶都係公屋政策嘅受惠者。前者係因為家庭收入高咗，例如啲子女長大之後出嚟做嘢，因而變成富戶。後者往往亦係因為子女成家立室，有能力置業或自己租樓住，令到父母變成寬敞戶。佢哋理應將有公屋單立交還或遷往較細嘅單位，以善用珍貴嘅公屋資源，畀啲更有需要、居住環境更差嘅家庭入住。

然而，房委會過去成功收回嘅富戶單位少之又少，收回寬敞戶單位更係絕無僅有，有必要盡快檢討，胡蘿蔔與棒子並用，加快收回或調遷程序。亦有人認為公營出租房屋唔應該只有一種，建議引入租金水平相對較高、但低於私樓嘅資助出租房屋，比啲買唔起、租唔起私樓，但收入高於現時輪候公屋標準嘅家庭租住，希望政府進行研究。

第五項建議係積極應對人口及樓宇老化問題，鼓勵居家安老及長幼共融，以新思維加快舊區重建。我喺2015年聯同不同界別嘅專家，成立「長者適切居所及相關配套研究工作小組」，就促進私人房屋發展提供長者適切居所，提出咗多項建議，包括修訂現行嘅規劃標準及多項法規，但至今都未見政府跟進。香港嘅「雙老化」問題將隨住時間愈趨嚴重，希望政府能夠果斷、有效咁處理。

最後一項建議係重組負責房屋、土地、運輸及環保嘅政府架構，加強政府作為「促進者」嘅角色，以提升覓地建屋及審批發展項目嘅效率。特首都講過，會就有關土地房屋發展嘅政策、法規同公眾參與程序進行全面檢視，希望加快覓地建屋嘅速度。由統一嘅政策局去負責有關檢討同修例工作，肯定比起現時由兩個、甚至三局分開去做，事半功倍。

主席，本人僅此陳詞，懇請議員支持我嘅議案。[:]