[:zh]「重建社會信心」議案 [:]

[:zh]主席，有關完善選舉制度嘅法案已於上月底通過及生效，加上《港區國安法》嘅實施，引領香港進入全新嘅政治格局，保障咗「一國兩制」嘅行穩致遠。但由於新冠疫情仍未消退，香港經濟尚未復甦，房屋問題、青年問題等深層次矛盾仍未得到解決，本會今日辯論有關「重建社會信心」嘅議案，係相當適時同適切嘅。

對於林健鋒議員提出嘅三項建議，包括制訂經濟復甦行動綱領、喺制訂重大經濟及民生政策過程中廣納民意，以及積極處理青年人嘅「三業三政」問題，大方向我係認同嘅，但具體應該點做，社會係有唔同意見。

首先有關成立「振興經濟委員會」。特區政府過去成立咗多個大大小小嘅委員會，招攬咗來自不同範疇嘅商界領袖、專業人士同專家學者做成員，為香港經濟發展及其他議題出謀獻策。問題係，政府最後採取咗幾多意見呢？係咪有決心同能力去執行呢？具體帶嚟咗乜嘢成效呢？好多市民都有疑問。

其次係透過問責官員落區、舉辦論壇、善用社交平台等方式廣納民意，與民共議。特區政府過去亦做咗唔少，部分係有成績嘅，但亦有唔少情況，尤其係涉及土地房屋發展嘅諮詢，花咗唔少時間，反反覆覆，但成效往往差強人意，與民共議變成議而不決、決而不行。

更甚者係，近年有唔少線上線下嘅諮詢活動，往往被一少撮人壟斷騎劫，將反對聲音無限擴大，將不實嘅資訊加速廣傳，將善意同建設性嘅意見完全被蓋過，廣納民意變成被人扭曲民意，令政府施政更加裹足不前。

我唔係反對政府做諮詢同聽民意，但必須採取合適同有效嘅方法，分辨理性同無理嘅意見，政府審視意見後要做決定，盡快落實執行，避免因為有唔同意見，就蹺埋雙手唔做嘢。

最後係有關青年人嘅「三業三政」問題，「三業」係指學業、事業同置業，呢啲問題係咪可以透過成立「青年發展統籌處」去解決呢？「三政」方面，喺過去幾年，香港已有唔少年輕人非常踴躍咁去議政、論政同參政，但結果又係點樣呢？點樣鼓勵佢哋和平、理性、客觀、包容咁論政呢？成立一個新嘅部門，係咪最有效嘅方法呢？

相對於原議案，何君堯議員嘅修正案係值得支持。佢提議加強十八區民政事務專員喺管理地區事務嘅權力，令佢哋可以快速反應，急民所急，「地區事務、地區解決」。區議會作為地區諮詢組織嘅績效，近年出現唔少問題，包括過份重視狹隘嘅地區利益、會議日益冗長低效等。

立法會嘅選舉同議事制度已進行改革，區議會嘅相關制度亦有改進必要，其中民政專員除咗應增加職權，同時亦要強化佢哋喺聽取及疏導地區民意嘅角色，包括協助推展一啲有利地區、有利全香港嘅發展計劃同項目，希望政府可以積極考慮。本人僅此陳詞。[:]