「促進綠色運輸發展」議案

主席，我發言係支陳紹雄議員提出嘅「促進綠色運輸發展」議案。原議案第一句就指出，運輸係香港第二大碳排放源頭，佔碳排放總量約20%。咁第一大源頭係咩呢？都係同陳議員有關嘅，就係發電，所佔比重高達60%，係運輸業碳排放嘅3倍。但有關比重已回落緊，主要係政府近年推動下，兩間電力公司近年不斷減少燃煤發電，改用天然氣。

不過，改用咗更環保嘅發電方法，電費都可能會貴咗。尤其係發生俄烏戰事，引發全球能源危機之後，唔少之前將環保減排掛在口邊嘅西方國家，都靜悄悄咁增加番燃煤發電，或者推遲原定嘅減碳時間表。我希望香港唔會走回頭路，但市民、議員同所有支持環保嘅人士，都要明白當中嘅代價。因此，要有效咁減少香港嘅碳排放，同時紓緩電費上升造成嘅影響，重點係要少啲用電。

香港約有9成嘅電力係用喺建築物，包括照明系統、升降機同扶手電梯、各類家用或辦公室電器，仲有，大家都知耗電量最高嘅空調系統。政府近年推出咗唔少政策措施同建築指引，去提高新起建築物嘅能源效益，但對於數量最多嘅現有舊式建築物，政府就做就唔算多。當中涉及業權問題、管理問題，市民嘅生活習慣同企業嘅營運模式等等，但係辦法應該係畀困難多嘅，所我希望政府喺呢方面加倍努力。

講番綠色運輸，近年好多議員、車主、以至車廠，都話要推動電動車嘅普及化。冇錯，喺路邊廢氣排放同噪音方面，電動車係比燃油車環保，但唔代表可以大幅咁減到碳排放，因為電動車都要用電嘅，一發電就要燒煤、燒天然氣。所以關鍵係要用少啲車，尤其係喺佔用路面同能源效益方面相對較差嘅私家車。

要用少啲私家車，方法之一係多用巴士、鐵路等集體運輸。呢個要有多方面嘅政策配合，包括隧道嘅收費政策，以減少塞車同整體私家車流量，但有啲人一講到隧道費要加就反對。另一方面要推動公共交通電能化、氫能化，香港近年做咗好多相關嘅研究同測試計劃，但三年又三年，改法例又用三年，至今都見唔到第一架可以用氫能嘅巴士投入服務。

要少啲私家車喺路面行走，最直接嘅方法其實係唔用車，唔坐車，改用單車，甚至行路。呢方面要從城市規劃著手，唔係純粹優化交通布局咁簡單。城市設計要做到職住接近，易於步行，減少市民坐車跨區返工、返學嘅需要，咁先至，我相信能夠大幅降低交通運輸造成嘅碳排放。

同樣，有關規劃理念喺舊區係好難做到，但新嘅發展區，例如係北部都會區同中部水域人工島，就有機會落實。政府都答應咗會咁做，希望真係做到。關鍵之一係善用專業，包括我代表嘅建、測、規及園專業，強調「規劃主導」，「以人為本」，避免變成「工程主導」，「以路、以車為本」。本人謹此陳詞。