《禁止餵飼野生動物(修訂)公告》察悉議案

主席，香港嘅野豬為患問題，已經出現多年。原因之一係有少數市民「愛心爆棚」，將野豬當成寵物，亂咁餵嘢畀佢哋食，搞到愈來愈多野豬完全唔怕人，走出市區搵食，甚至識得上電梯，落地鐵，對居民及郊遊人士造成滋擾，以至發生多宗襲擊傷人個案。呢個正係政府今次提出修例，將禁止餵飼野生動物嘅範圍，由原來嘅幾個指定區域，擴展至覆蓋全個香港嘅主因。對於今次修例，我係支持嘅。

市民餵飼只係近因，底因係香港嘅野豬已冇晒天敵，導致過度繁殖，出現生態失衡。香港曾經有老虎嘅，但最後一次發現虎蹤，已係1947年嘅事。港府其後成立咗野豬狩獵隊，希望代替老虎控制野豬嘅數目，但唔知點解，喺全無諮詢下，野豬狩獵隊喺2019年突然畀當局取消咗，令問題變本加厲。

漁農署喺2017年開始，推行野豬避孕同絕育計劃，當時已有唔少專家同議員，質疑該計劃嘅成效。「實踐係檢驗真理嘅唯一標準」，結果證明有關計劃完全失敗，但署方花咗5年時間，先至行番獵殺嘅政策。不過，可能礙於有一啲所謂嘅「愛護動物」人士反對，獵殺嘅範圍同行動都相當少，遠遠追唔上野豬嘅繁殖速度，亦缺乏明確嘅控制野豬數目同活動範圍嘅目標。

同之前嘅馬騮為患問題一樣，對於野豬問題，政府畀人嘅感覺只係見步行步，逼到埋嚟先做，缺乏積極性、前瞻性同周詳計劃。同我啱啱之前先講完嘅綠色運輸一樣，政府研究3年、試驗又幾年、修改法例又用多幾年，前後冇十年八年時間都做唔到嘢，野豬數目又唔知翻咗幾翻。

議員喺審議期間質疑，今次修訂公告內嘅「野生動物」定義，剛才小組主席周浩鼎議員都講咗，係唔包野鴿同流浪貓狗，因為佢哋喺法律上被歸類作「馴化類動物」。部分市民喺市區餵飼野鴿，導致其過度繁殖，造成日益嚴重嘅環境及公共衞生問題，亦唔係呢幾年先出現。官員畀議員問起，又話會進行修例嘅，又唔知要再等幾耐，係咪要等多3年又3年呢？

最後係執行問題，唔少議員都擔心，就算我哋立咗法，修咗例，當局係咪有能力做好執法同宣傳教育工作，有效咁禁止、同改變市民餵飼野生動物嘅習慣。有議員，剛才周議員都講，憂慮政府唔夠人手，我就反而憂慮當局會話因為有新法例，新工作，所以又要求立法會批准佢哋大幅增加人手。

環境局喺重組成為「環境及生態局」，並將環保署重新分拆之後，已增加咗唔少人手，之前針對垃圾徵費計劃亦加咗唔少人。我希望局方同署方可以透過精簡流程，減省過時同不必要嘅工作，充分善用現有嘅人手同資源，更有效咁處理好香港生態失衡嘅問題。本人謹此陳詞。