就3項塑膠購物袋徵費計劃附屬法例之總結發言

主席，首先感謝有多位議員發言支持我嘅議案，包括G19嘅同事，對於表示反對或有保留嘅議員，我在此作出簡短回應。

有議員指出，進一步調高膠袋徵費，會加重市民嘅負擔。我提議將徵費由1蚊加到2蚊，並非真係希望消費者每次買嘢都要畀多1蚊，其實我係想佢哋連原本嘅5毫子或者1蚊都可以慳番。好似有議員都指出，市民係有選擇權嘅，可以自備購物袋。

有議員批評徵費係針對基層小市民，實情基於資源問題，陳克勤議員亦指出，小市民往往更加注重環保，部分的家庭主婦、長者、外傭姐姐等，早已習慣自備購物袋同重用。

亦有人質疑今次加費係益咗啲商家，雖然現時膠袋徵費係由商戶收取，毋須交還政府，但其實塑膠購物袋嘅成本同徵費水平，相對於裡面載住嘅貨品價值同商戶嘅整體營業額，都係微不足道嘅。喺依家百物騰貴嘅通脹環境下，仲有乜嘢係只賣1蚊、2蚊一件，而又需要用到膠袋去載住嘅呢？當然，我亦十分高興局長剛才提及鼓勵有關商家收咗徵費後要善用，特別是用於環保方面。

多位議員亦有提到宣傳及推廣、教育市民係非常重要，局長亦表示會加強。不過，我想指出政府過往俾人的感覺只係集中教導消費者，好少向商舖同食肆嘅老闆、員工，以及貨品嘅生產商同包裝設計者做推廣及宣傳，希望佢地在這方面也減少不必要的膠袋，從而對環保出一分力。海內外嘅經驗都證明，單靠宣傳教育，係唔足夠有效、持續推動環保，某程度嘅經濟誘因給予自備購物袋的市民。同時，當然亦要有罰則，在多管齊下，效果會更好。

主席，無論我嘅議案最後能否通過，我都希望引起社會對濫用膠袋的關注。今次的辯論有二十多位議員發言，提出的意見間接幫咗政府做咗一場大型宣傳活動。而無論最後每個塑膠購物袋嘅收費係5毫、1蚊、定係2蚊，都係希望提醒大家盡量減少用、重用、甚至唔用，攜手為香港、為全球嘅環境生態同減排減廢出一分力！

主席，我在此再次呼籲議員支持我嘅修訂議案，支持環保滅少濫用膠袋。如果有關修訂不獲通過，我同所有G19議員都會支持由局長提出，將膠袋徵費由5毫增至1蚊嘅原議案。主席，本人謹此陳詞。