就3項塑膠購物袋徵費計劃附屬法例之首輪發言

主席，香港喺2009年引入膠袋徵費，希望透過「污染者自付」原則，促使市民喺消費時減少濫用膠袋，從而保護環境生態，減輕堆填區嘅壓力。首階段計劃喺超市等大型連鎖店推行，每個膠袋收5毫，成功令有關店舖嘅膠袋用量大減，可惜適用範圍比較窄。直至2015年將徵費範圍擴至超過10萬間零售商舖，令全港嘅塑膠購物袋棄置量減少約四分一。

不過，隨着通貨膨脹、部分市民適應咗5毫子嘅收費水平，仲有係濫用豁免徵費膠袋嘅情況多咗，近年嘅塑膠購物袋棄置量有所回升。單計2020年就估計【揼】咗42億個，即係平均每人每月棄置47個膠袋，明顯係超出實際需要。政府因此建議調高徵費，同時取消部分豁免，希望進一步減少濫用情況，為環保出一分力。

根據調查，政府估計將徵費加到1蚊，可以令膠袋用量減少四分一，如果加到去2蚊，減幅就會增至四成。四分一同四成，對堆填區、對我哋嘅環境嚟講，係有相當大嘅差別，點解唔做多啲、做好啲呢？呢個就係我提出修訂，建議將最低徵費由1蚊加到2蚊嘅原因。

我嘅建議得到唔少市民、團體同議員支持，但亦有部分人有保留。政府決定維持只加到1蚊嘅原建議，但如果立法會今日通過我嘅修訂，改為2蚊，政府表示都樂意接受，唔會因而撤回相關議案。我係理解同歡迎政府嘅做法，反映咗喺新時代嘅議會、新篇章下的政府，行政立法互相制衡，同時互相配合嘅關係。

對於議員嘅反對理由同坊間嘅一啲誤解，我等陣一次過回應。依家先講幾個無論係收1蚊定2蚊，政府都必須加強同加快處理嘅問題。

第一個係執行同執法，如果商戶唔落實執行，政府唔嚴格執法，就算加到10蚊一個膠袋都冇用。尤其係調高收費同收窄豁免範圍之後，違規派膠袋、同市民濫用免費膠袋嘅情況好可能會增加，政府因此必須加強宣傳教育，加強執法。

第二係唔少人都指出，坊間好多所謂嘅環保袋其實好唔環保，對環境生態造成嘅破壞隨時大過傳統膠袋，政府會否作出規範，訂立一啲標準呢？

第三係聲稱比較環保嘅可降解膠袋，品質同可降解程度，同樣係缺乏規範同標準，令市民及商戶無所適從。

第四係配合將於明年下半年實施嘅都市固體廢物徵費計劃，推行「一袋兩用」。讓市民可以喺零售店舖購買符合要求嘅購物袋用嚟載嘢，之後又可以作為指定垃圾袋，「一袋兩用」，又方便、又環保、又慳到錢，希望政府能積極推動。

第五係除咗膠袋之外其他塑膠製品，其實同樣對環保造成損害，希望政府正視，唔一定全部要以立法或徵費方式規管，但亦不應完全冇王管。

為咗環保，為咗減少濫用膠袋，懇請議員支持我嘅修訂議案。