施政報告致謝動議 第三節辯論

切實排解民生憂難

主席，對於好多基層家庭、青年人，以至中產階層，住屋問題仍然係最大嘅民生憂難。今屆政府提出「提量、提速、提效、提質」覓地建屋，經過發展局同房屋局嘅努力，公屋輪候時間已顯著回落，政府覓得嘅公營房屋用土地，已較十年長策推算多出約10萬個單位，有關數字令人欣喜。

不過，入住出租公屋，即俗稱嘅「上樓」，並唔係香港市民嘅唯一住屋訴求，政府仲要協助較有能力嘅家庭置業安居，即係「上車」；以及促進整體社會，尤其係青年人向上流動，即係「上進」。上樓、上車、同上進，呢三個「上」字係需要並駕齊驅，不能偏廢。

近年不時有報道指出，有啲年輕人為咗保住輪候公屋資格，不求升職加薪，甚至乾脆辭工唔做等上樓。現時嘅出租公屋政策，係咪防礙咗社會向上流動，尤其係青年人嘅發奮上進動力呢？不斷大量加建出租公屋，會唔會令人覺得香港嘅貧富懸殊日益嚴重，愈嚟愈多市民冇能力自置居所，要長期依賴納稅人提供大量嘅房屋補貼呢？公私營房屋供應嘅7:3比例係咪一成不變？政府係咪有需要檢討，善用有限嘅資料，協助市民置業安居。

今屆政府強調「精準扶貧」，除咗因為面對財赤，要小心控制醫療、福利同交通補貼等經常性開支，減少濫用、浪費同重複資助。另一點我認為更重要嘅，係防範香港變成某啲西方福利社會咁，因為福利太好而變成「養懶人」，助長咗部分青年人所謂嘅「躺平」文化，削弱咗特區嘅發展動能。

施政報告建議為「劣質劏房」制訂最低標準同長遠取締方案，反映政府除咗關注房屋供應嘅量之外，亦重視單位嘅質素同市民嘅居住空間。我十多年前首次參選時已倡議要制訂「人均居住面積指標」，但當時整體房屋供應連量都不足，政府因而未能兼顧單位面積同質素。隨着居住單位供應可望喺幾年後高於需求嘅目標，應有一定空間作出改變，落實「人均居住面積指標」同時間表，讓港人「住大啲、住鬆啲、住好啲」。

除咗居住面積同質素，仲要有良好嘅城市規劃、完善嘅交通同社區配套，先至可以成為一個宜居、宜業、宜遊嘅城市。政府近年強調「基建先行」，但道路同鐵路建設往往都係大落後。其他社區配套，好似超市、街市、學校、同文娛康體設施，往往更係入住使用咗多年後先開始起。遠嘅有將軍澳同天水圍，近嘅有東涌、安達臣道同皇后山嘅發展區，要居民做開荒牛，日日排長龍等巴士，希望嚟緊嘅北部都會區同人工島發展唔會重蹈複轍。

早前嘅極端天氣同「石屎雨」問題，突顯香港嘅樓宇老化同違規僭建問題嚴重。報告提出多項措施加快市區更新同舊樓重建、優化強制驗樓及修葺工作、修例加重僭建罰則及簡化檢控程序等，都係我同業界多年來嘅建議，希望可以盡快落實推行。

除咗樓宇老化，香港嘅人口老化問題亦日益嚴重。多年前我聯同多位來自不同界別嘅專家，就推動有助居家安老同長幼共融嘅建築設計及樓宇設施提出建議。當中房協同房委會有採納到部分建議，但私樓方面就冇乜進展。今年施政報告終於有正面回應，指明由財政司副司長統籌各相關政策局，推動有利長者生活嘅樓宇設計。雖然係姍姍來遲，但仍然值得支持。

就環保問題，政府近年推出多項環保減廢同節能減排措施，包括調高膠袋徵費、擴大生產者責任制、規管即棄塑膠用品、以及明年4月實施嘅都市固體廢物收費，以上措施我都係支持嘅，有啲我仲覺得係唔夠進取。但我亦都明白，從市民角度，一時間推出咁多措施係會令人花多眼亂，未必能夠即時適應。

除咗做好宣傳教育及提供適切配套，我多次強調政府要善用物業管理公司，因為佢哋同居民嘅接觸係最多、最密切嘅。除咗減廢減排，喺保障樓宇安全、打擊僭建，以至協助隱蔽長者、防範家庭暴力及虐兒個案等，物管公司都應該可以幫到下手，協助政府處理多種民生憂難。但社會過往對物管業界係比較忽視嘅，我希望今屆政府可以作出改變，加強對物管業嘅重視同支持。