施政報告致謝動議 第四節辯論

共同維護和諧穩定、青年興則香港興

主席，時間關係，呢節辯論我只講一個教育問題，就係大學資源同資助學位嘅分配。早喺疫情之前，我已向政府反映我哋界別，建測規園，出現日益嚴重嘅人手不足，要求各大學因應市場需求，增加相關嘅資助學額，但政府回覆話呢啲係屬於「大學自主」範圍。有關回覆，我係感到氣餒。

近年香港出現移民潮，人口老化同「少子化」加劇，再加上要加快覓地建屋同推動更多基建，依家唔止建測規園專業，連前線建築工人同中層技術人員亦嚴重短缺。唔止配合唔到政府嘅提速、提效、提量建屋政策，以及多個大型發展計劃，就可能連基本嘅工程質量、造價成本、以至工業安全都可能受到影響。

政府去年提出為建造業輸入外勞，我強調更加重要係加強培訓同留住本地人才。今年施政報告推動成立「應用科學大學」，希望可以幫香港培育更多職業專才，我同業界都係非常支持嘅，但始終取代唔到由現有大學提供嘅資助學士學位，其中建築師同園境師更需要有碩士學位。

主席，香港現時面對唔少積存咗好耐嘅問題，必須積極應對。我深信教育局會著實處理我哋業界面對嘅問題，唔會遇難避事。本人謹此陳詞，感謝行政長官向本會發表施政報告，支持致謝動議。