施政報告致謝議案發言 第一節：着力提高治理水平

主席，「勾劃藍圖開新篇、排難解憂看實踐」，呢14個字係我當天用嚟形容特首嘅首份施政報告。報告吸納咗社會各界，包括我同建測規園業界嘅多項建議，就香港嘅未來發展，提出咗清晰嘅方向同宏遠嘅藍圖，係值得稱讚嘅。但剩低嘅問題係，政府係咪可以講得出，做得到呢？各位問責官員同各級公務員，係咪可以更積極、更有效咁落實相關措施，做到市民切身感受到嘅成果呢？

習近平主席喺「七一講話」提出嘅「四點希望」，第一點就係「着力提高治理水平」，呢個亦係今年施政報告嘅首個重點。報告提出要完善特區嘅治理體系、建立「議而有決、決而有行」，「以結果為目標」嘅管治文化、訂立約110個績效指標等，不少都係我多年來嘅倡議。

報告建議從4個方面優化公務員管理制度，包括更新《公務員守則》，強化公務員嘅賞罰機制、培訓及動員能力，呢啲我都認同嘅，但我認為應再加多兩點：第一係如何改變部分公務人員嘅心態，加強佢哋作為「促進者」嘅角色；第二點係檢視現有公務員嘅人手、工作同程序，更有效率咁善用人力資源。

政府現時財赤嚴重，未來幾年亦未必能迅速好轉，冇可能再大增人手，去落實各項新政策、新藍圖。近年政府要求加人、加位、加薪就多，但甚少聽到會主動檢視、刪減某啲已過時嘅職位同過剩嘅人手。有啲工作同程序做咗廿幾年，係咪仲有實際需要同優化嘅空間呢？係咪可以利用創新科技去取代部分工作？又或者外判出去畀私人市場，會做得更平、更快、同更好呢？

好多公務員係好忙嘅，但未必係忙於做實事，幫市民，而係忙於走程序。當中發展建設工作就係好例子，過去發覺有啲嘢做得唔係咁好，就加程序、加指引、加監管；有啲嘢做得慢，滿足唔到市民期望，就不斷加人、加位、甚至加多幾個局同部門，但結果反而愈做愈慢，見身郁唔見米白，市民遲遲感受唔到想見嘅成果。

政府近年終於汲取到教訓，知道想加快發展建設，加人、加程序唔係辦法，而係要精簡法規同審批程序。咁樣唔單止市場會做得快啲、好啲，政府同事亦會做得開心啲，亦可騰出人手應付新嘅工作同發展，做到習主席提出嘅，「把有為政府與高效市場更好結合起來」。本人謹此陳詞。