施政報告致謝議案發言 第二節：不斷增強發展動能

主席，早喺黑暴同疫情之前，我已指香港將會出現日益嚴重嘅勞動力短缺同出生人口減少問題。喺施政報告諮詢期間，我聯同G19嘅議員同事制訂呢本題為《全面檢視及落實人口及人才政策》嘅報告書，提出咗13項具體建議，希望做到「七一講話」中嘅「不斷增強發展動能」。當中多項有關招攬人才嘅建議，已獲施政報告採納。但喺人口政策方面，包括鼓勵生育，促進長者、婦女同退休人士再就業等等，報告就著墨不多，令我頗感失望。

即使係招商引才，報告針對嘅企業同人員，亦只係集中喺金融、創科等少數所謂嘅「高端產業」同「高端人才」。對於其他同樣人手短缺嘅行業，包括建造業，報告話交由個別政策局去檢視，冇目標，亦冇時間表，而且檢討範圍似乎只針對某個階層同工種。

主席，「十四五規劃」提出香港嘅「八大中心」定位，雖然冇特別提到建造業，但其實不論係發展金融、創科，定係文體旅遊，在在都需要喺土地開發同建築、基建方面配合。施政報告提出要「提量、提速、提效、提質」覓地建屋，要加快推展北部都會區，要規劃多條新鐵路同主幹道等，我同業界都支持。但若果缺乏足夠同優質嘅相關人才，政府嘅鴻圖大計恐怕會淪為空談。

現時建造業界除咗面對地盤工人短缺同高齡化問題之外，中高層嘅專業人士同技術人員，包括我哋建測規園界，亦同樣係人手不足。我多年來要求政府正視有關問題，做好人才規劃，包括因應市場需求同配合政府政策，增加與發展建設相關嘅大學學額。結果係發展局推教育局，教育局推教資會，教資會就話呢啲係大學自主，但大學用嘅大部分都係公帑，冇理由喺開辦資助課程同學額方面，可以漠視政府嘅政策同社會嘅需要。施政報告喺呢方面再一次交白卷。

除咗發展、建造業界，物業管理業亦面對嚴重嘅人手不足，缺乏年輕人加入，難以配合大量新發展，應對樓宇老化同防疫常態化。我曾經多次向政府反映有關問題，但施政報告卻係隻字不提。 香港需要推動產業多元化，畀青年人更多不同選擇，唔係只有做金融、創科，先會有出頭天。政府要加強職專教育同生涯規劃，提升有關行業嘅形象同改善工作環境，改變部分家長嘅心態同過時嘅認知。主席，本人謹此陳詞。