施政報告致謝議案發言 第三節：切實排解民生憂難

主席，習主席喺「七一講話」提到，香港當前嘅最大民心之一，就係希望可以住大啲、住好啲，呢個亦係我喺10年前首次當選立法會議員時提出嘅願景。我樂見今年嘅施政報告，採納咗我同業界嘅多項建議，包括將特首競選時提出嘅「提速、提效、提量」目標，再加上「提質」，提升建屋嘅質量同市民居住嘅質素。

報告要求大幅縮減將「生地」變「熟地」嘅時間、檢視「綠化地帶」發展潛力、成立專責部門推展北部都會區同提高佢嘅地積比率、檢討停車場樓面寬免安排、成立專責組促進私人住宅項目嘅圖則審批、擴展標準金額補地價安排等，我喺不同時段都提出過，依家終於成為政府嘅政策同目標。

不過，正如我喺頭兩節辯論時候指出，上述政策係咪落實得到，係咪落實得好，重點係要公務員努力配合，業界亦要有足夠嘅人手同適切嘅配套。例如係推動多用「組裝合成法」/MiC去加快建屋，前提係有足夠地方畀業界進行組裝。報告提出喺北部都會區提供相關嘅生產同埋儲存用地，我同業界都係好贊同，但可以提供到幾多、幾大嘅用地，幾時提供到，租金係點計，租期有幾長，呢啲都係非常重要嘅。

政府現時有部分用地，係以短期租約方式，租畀唔同嘅企業同行業營運，部分營運對有關嘅行業、香港嘅經濟同發展，以及配合政府最新嘅政策方面，具有重要嘅作用。但係奈何，根據現行政策，租期往往只得2至3年，最長亦只有7年，令相關企業難以作出較大投資，造成削弱香港整體競爭力。我希望政府檢討有關政策，尋找更多適合嘅用地，以較長嘅租約，租畀喺相關政策下值得支持嘅行業同企業。

報告提出就業界應用「建築信息模擬技術」，即係BIM，去呈交及審批建築圖則訂立咗路線圖。要有效率咁推行，政府必須加強對中小企嘅支援。現時嘅資助集中喺前期嘅軟硬件嘅投資，但係要做得更好，政府應進一步支援企業培訓員工方面，等佢哋熟習應用BIM。相關大學學額亦需要增加，希望政府唔好又話大學自主，重複好似醫護人員短缺嘅困境。

另外，近年建造業界發生多宗嚴重工業意外，以及冇依足圖則或程序施工嘅個案。過往呢啲問題主要發生喺基建、土木工程，但最近連樓宇建築工程亦好似多咗。係咪同施工嘅時間不合理地壓縮，或者係同價低者得嘅招標制度有關呢？會否有人因貪快而引致意外？對於政府不斷強調提速、提效，包括喺招標時向可縮壓施工時間嘅投標者加分，會唔會因而影響到工程質量同安全水平呢？

最後講下運輸基建。施政報告提議興建多條新鐵路同主幹道，希望通過「基建先行」嚟「創造容量」，驅動香港嘅經濟同城市發展，呢個大原則我係支持嘅。

然而，政府過往喺做運輸基建嘅時間，剩係研究往往都搞成三五七年。最慘係因為政府做緊研究，而凍結晒區內嘅公私營項目審批申請進展，拖慢咗房屋供應。政府話唔會咁做，但之前確係有唔少私營房屋發展項目，雖然已取得相關政府部門批准，去到更改契約條款同補地價嘅階段，因為政府有新路要做規劃同研究，部門就停止工作，一停就係好多年。就此，我希望政府會關注呢個情況，同作出較平衡嘅做法。