[:zh]根據《建築物條例》(第123章)第2(3)條擬議決議案發言稿[:]

[:zh]主席，香港僭建情況嚴重，治本方法當然係人人守法，唔僭建，有唔清楚、有疑問就搵相關部門或者專業人士查詢。僭建問題自然就可以迎刃而解。另外，要打擊僭建，除咗加大力度巡查，執法同罰款，對牟取暴利而僭建嘅業主，一定要有阻嚇力嘅罰則，令佢哋無利可圖。

鑑於現時針對僭建嘅法例，執法需時，罰則阻嚇力唔高，促使唔少違法僭建嘅無良業主，妄顧公眾安全，為利是圖，直至屋宇署巡查到，一味用「拖」字訣，最終無辦法先清拆。

當然亦有業主唔清楚，乜嘢係僭建，為求方便，做咗先算。屋宇署响2001年至2010年推行為期10年嘅取締樓宇僭建物計劃，特別針對有迫切危險，須予以取締類別的僭建物，發咗接近30萬張清拆令，又清拆咗40萬個僭建物，本來係好好嘅，但野草燒不盡、春風吹又生！

响2010年底，當局响《建築物條例》內引入「小型工程監管制度」，希望促進樓宇安全同令建築監管制度更加務實，方便有關人士守法。响哩個制度之下，一些性質簡單同安全風險較低嘅小型建築工程，毋須事先花費、或花時間聘用認可人士向建築事務監督遞交申請批准，然後先可施工。

當年有118項建築工程，例如冷氣機支架、修葺排水渠等被納入小型工程監管制度，同時當局亦提供「檢核計劃」，令小型工程項目裏面若干設施，响小型工程監管制度實施前，未經批准已經做咗，如果獲得到訂明嘅建築專業人士或註冊承建商進行安全檢查，確認係安全，當局就唔會發出拆卸令。

「檢核計劃」雖然唔理想，但响顧及安全的大前題下，一來兼顧住戶嘅實際需要，二來亦可以減低業主或者住戶因為要修正而帶來的負擔，亦可以避免浪費，我係支持嘅。

今次決議案，建議納入最近《建築物（小型工程）規例》修例後，指定額外11類小型設施，包括訂明類型嘅無線電通訊構築物、實心圍牆或網欄等，擴展「檢核計劃」至有關設施，延伸之前嘅做法。我認為喺確保安全原則下，係可以支持嘅。

當然哩個事後補鑊嘅做法唔係最理想，但亦係實事求是嘅做法，最重要係確保哩啲小型設施唔會對公眾構成危險。不過，最好當然係人人守法，唔好僭建，懷疑有僭建風險，就要諮詢專業人士，確保冇違法，唔影響樓宇安全，人人住得安心、放心。本人謹此陳辭。[:]