[:zh]「以口岸經濟帶動新界北發展」議案[:]

[:zh]主席，感謝劉國勳議員提出今次「以口岸經濟帶動新界北發展」嘅議案。香港開埠頭百多年來嘅發展，都係集中喺南面，尤其係維多利港兩岸，估計原因之一係香港依賴港口經濟、海上貿易起家；其二係因為英國人通過武力，將香港由中國手中借番嚟、搶番嚟，因此要嚴守北面同中國大陸嘅邊界，唔會將重要嘅經濟設施同商業發展，放喺租借返嚟嘅新界。

香港人口之後不斷增多，香港島同九龍嘅發展日漸飽和，港英政府開始發展多個新界新市鎮，主要係用嚟住人同做工廠。隨着其後工業北移，大部分經濟活動同就業職位仍集中喺香港南部，好多新界居民要每日長途跋涉到市區工作，產生日益嚴重嘅塞車、污染同交通費問題。新界北部同口岸地區，因為好似巨局長所講，要防範走私偷渡，好多土地都列為邊境禁區，難以發展。

不過，隨着香港回歸祖國，經濟轉型，以及國家自改革開放40年來嘅高速發展，拉近咗兩地嘅經濟及生活水平，由內地偷渡嚟香港嘅人幾近絕跡，反觀依賴內地經濟、內地旅客，以及喺疫情前要每日、每周，經不同口岸往返內地嘅香港居民就多咗好多，令到特區政府需要不斷加建陸路口岸及跨境交通基建、縮減邊境禁區範圍，以至全盤重新思考香港嘅規劃發展格局。

隨着美國等西方反華勢力對中國嘅打壓加劇，國家確立以內循環為主體嘅雙循環發展策略，香港必須加快將發展重心向北移及西移，推動口岸經濟，更好地把握深圳、珠海，以至整個大灣區高速發展帶嚟嘅龐大機遇，為香港經濟及社會民生發展注入新動力、引領新方向。

近年先後落成啟用嘅港深西部通道、高鐵香港段、港珠澳大橋、蓮塘/香園圍口岸，以及仍喺興建、籌劃階段嘅落馬洲河套區創科園、皇崗口岸一地兩檢、明日大嶼願景同新界北新發展區等，我相信都係循呢個方向發展。但正如其他好多良好嘅發展計劃同政策措施，政府都係做得太慢。喺深圳河以北三、五年就做好嘅嘢，香港現時往往搞成七年、八年，甚至十年、廿年都未搞到。主席，機會係唔會等人嘅，香港再唔加快，就會畀內地發展進一步拋離。

另外，特區政府要加強與深圳、廣東省政府及相關中央部委嘅溝通協調，唔好剩係諗自己，剩係睇深圳河以南，要站喺國家大局思考，配合內地嘅規劃同發展，最好當然係做好機制對接，共同規劃發展。唔少市民都覺得，好多內地嘅發展規劃建議，香港嘅官員可能係睇報紙報道先知。咁樣當然唔掂，必須從速改善。

時間所限，我唔能夠一一回應原議案及姚思榮議員嘅修正案嘅各項內容，原則我都係支持嘅，尤其係喺加快北區及跨境交通基建、土地改劃及發展流程方面。不過，對於將政府嘅部門搬到新界北部，我覺得要審慎考慮。本人僅此陳詞。[:]