「檢視工程審批流程及統整建造標準，善用創新技術減省建造成本和時間」議案

主席。就簡化發展審批流程，我應該係最早關注有關問題嘅立法會議員。早喺十多年前我首次參選立法會議員時，因應香港先後發生咗公屋短椿醜聞、多項大型基建嘅超支及延誤事故，仲有一啲大多缺乏事實根據嘅官商勾結、利益輸送指控，令到香港嘅發展審批流程同要求愈收愈緊，大大增加咗建造成本同發展及施工嘅時間，窒礙咗香港建設嘅效率。當年我促請政府大幅精簡相關審批流程，只係一把小眾聲音，依家已成為本會同社會嘅主流意見。

經過多年爭取，立法會去年通過修例，簡化同加快咗部分與發展相關嘅法定審批程序。發展局亦早喺上屆政府開始，喺局長嘅領導你嘅下推動其下部門精簡行政審批流程，做出咗唔少成績。但發展建設審批涉及嘅唔單止係發展局，仲包括房屋局、運流局、環境局、以至保安局嘅消防處等等，相關部門嘅審批程序亦必須加以精簡，先至能達到最佳效果。

劉國勳議員嘅原議案提出嘅6點建議，包括檢討《建築物條例》及相關條例、精簡審批流程及統整建造標準、設立專責部門或擴大「項目辦」嘅統籌職能、以獨立專業核證嚟替代部分行政審批、就政府內部嘅跨部門諮詢設定時限或服務承諾，以及引進創新嘅建造科技、技術同物料等等，都係我一直倡議嘅，我自然係支持。

不過，正如我過去多次指出，除咗精簡流程、整統標準同善用科技之外，更重要係改變主事官員嘅處事心態。唔單止要做好監管工作，仲要扮演好「促進者」嘅角色，貫徹落實習主席提出嘅「將高效市場同有為政府更好結合」。

主席，前日又發生咗一宗嚴重工地意外，奪去兩名工友嘅性命及有三人受傷，實在令人婉惜。立法會去年已完成修例，大幅提高多項職安健罪行嘅最高罰則，但之後嘅嚴重工業意外事件似乎未有因而回落，印證咗我同業界一早提出嘅，單靠事後告人、罰人，並非防範意外發生嘅最有效方法。

黃國議員嘅修正案，建議推動及資助業界善用科技以減少工業意外，我係非常支持。但係近年社會、政府、仲有我哋嘅部分立法會議員，似乎都太過強調提速提效，喺審批撥款時，往往要求政府壓縮整個發展週期，間接逼使承建商要縮短施工期，因而增加因趕工而發生意外嘅機會。我希望大家今後會多加注意。

除咗施工期過短，人手不足亦會增加工地意外風險，同時導致建造成本上漲。因此我係認同龍漢標議員嘅修訂建議，適度放寬建造業輸入勞工計劃，包括私營工程合約，以紓緩業界面對嘅人手短缺問題，但同時要加強佢哋對工地安全嘅意識同認識。本人謹此陳詞，支持原議案及各項修正案。