《2023年電訊(修訂)條例草案》二讀發言

主席，今日恢復二讀嘅《2023年電訊(修訂)條例草案》，旨在規定所有新建嘅指明樓宇，必須預留一定空間以至獨立嘅房間，用作設置包括5G基站等流動通訊設施。草案亦訂明獲通訊局授權嘅流動網絡營辦商，可以同現時固網服務營辦商一樣，有權進入有關樓宇嘅預留空間，裝設同維護相關流動通訊設施。過程中樓宇嘅業主同物業管理人員不得無理阻撓，包括唔可以要求有關獲授權嘅公司同人員，支付入場費或租金等額外費用。

我一向支持香港嘅智慧城市發展，當中穩定、可靠、高效、以及覆蓋全面嘅流動網絡係至為關鍵，否則好多嘢都可能做唔到，服務水平難以提升，智慧政府同電子政務難以有效實施，以一網通辦、全電子方式處理公共服務，包括醫療、教育、申請各類福利，仲有智慧出行等等都無法落實。故此，提升流動網絡覆蓋率同滲透率就變得更為重要。因此對於條例草案嘅立法原意同原則，我係相當支持嘅。

不過，對於草案強制所有新建指明樓宇，都要預留空間設置有關流動通訊設施，以及授權營辦商可以毋須付費或額外批准，就可以進入相關樓宇，我所代表嘅建測規園業界，包括一啲發展商、建築設計師同物業管理公司，係有一定嘅疑問同關注嘅。

其中一樣擔心嘅就係審批問題，會否因為要預留空間設置流動通訊設施，而大幅影響到建築設計圖則同施工審批；係咪又要業界跑多幾個部門，耗費更多嘅時間同資源先至獲准施工，仲有完工後嘅入伙同出售成交嘅批准。

物管公司就擔心，授權流動網絡營辦商不時進入大廈內裝設同維護相關設施，會否增加佢哋工作量同與業戶之間嘅爭拗，包括有關預留空間嘅安全同保安問題，相關嘅維護保養費用等等。

此外，我同唔少議員都關注，草案剩係規管新建嘅指明樓宇，包括單位同樓層超過某個數目嘅住宅及商業樓宇，但唔包眾多嘅現有建築物，亦唔規管政府建築物同其他公共設施。對於一啲喺可見將來，都唔會有新樓宇發展嘅地段同鄉郊偏遠地區，政府又有咩具體計劃同時間表，去提升有關地區嘅網絡覆蓋呢？

政府強調現時香港嘅5G網絡已覆蓋逾9成人口，核心商業區嘅覆蓋率更高達99%，喺草案通過及實施之後，政府有冇信心可以喺幾年內，將覆蓋率再提升多幾個百分點，去到95%或以上呢？希望政府有清晰嘅目標，包括可以帶來嘅社會效益。

部分現有樓宇遲遲都未有加裝相關5G設施，原因之一係未能取得全部業主嘅同意。有啲業主係認為冇需要，但冇考慮其他業主同租客嘅需要。有啲係擔心輻射問題，雖然科學家已證明有關5G基站輻射量係唔會影健康。政府有需要向公眾多加解說，向小業主講解改善流動網絡覆蓋對香港整體社會，以至對個別住戶及相關物業價值帶嚟嘅益效。

另外，我過去亦收到一啲現有樓宇嘅業主反映，即使佢哋已取得所有業主同意，並向個別流動網絡營辦商發出邀請，對方都唔願意進場為佢哋加裝5G設施。原因可能係對方認為唔符合成本效益。

草案向流動網絡營辦商提供更多便利同優惠，包括毋須為新建樓宇加裝5G設施而支付入場費或租金，佢哋係咪都應該相應承擔番一啲社會責任同義務呢？例如必須按當局指示，喺某啲地點加裝設施同提供服務。就算相關樓宇因某啲原因真係加唔到，係咪可以加喺附近嘅哋點，好似電話亭、燈柱、電箱等呢？我唔希望營辦商只做樓宇密集嘅地區，而戶數少嘅樓宇，偏遠啲嘅地區，就交畀政府、由納稅人去包底建設相關設施呢？

對於已裝設5G設施嘅現有樓宇，有時喺地庫同部分高層單位都係收得唔好，呢方面亦請通訊局與營辦商諗下辦法改善。此外，法例規定高過某個層數嘅大廈，需要喺樓層中間設有「避難層」，附有照明同灑水系統，應該適合用嚟設置有關流動通訊設施嘅，希望政府可以積極考慮如何克服問題，包括消防要求，加以善用有關空間。

主席，就以上種種問題，我先後去信咗法案委員會同直接寫畀商經局局長，要求當局進一步澄清同提供更多資料。好感謝丘局長聯同幾位同事，向我作出詳細講解，亦好詳盡咁回覆咗我兩次嘅書面提問。局方之前亦安排咗部分議員去做實地考察，了解現時流動網絡營辦商，喺現有樓宇加裝5G設施嘅情況，解答咗我同其他議員嘅大部分疑問。

我亦好高興睇到，政府對於我同業界關注嘅審批程序問題、提升政府設施同偏遠地區嘅覆蓋率、相關設施同空間嘅日常管理及維修保養等，作出咗一啲具體交代同承諾，包括向消防處跟進有關「避難層」嘅問題。局方其後亦特別就草案內容同實施細節，諮詢咗我做咗6年主席嘅物業管理業監管局，以釋除各界嘅疑慮。

草案稍後如果獲得三讀通過，通訊局、屋宇署、地政署等多個部門，仲需要制訂同修改相關指引及程序，做好條例嘅全面落實。我希望局方會秉承良好態度同高效作風，做好統籌協調工作，與相關部門、業界、同持份者廣泛溝通解說，攜手進一步提升香港嘅5G網絡，以至未來6G、甚或7G服務嘅覆蓋率，將香港建設成更加智慧、宜居同安全嘅城市。

本人謹此陳詞，支持草案二讀同三讀。