「深化行政改革，堅持完善治理體系」議案發言

主席，我多年來都關注公務員嘅績效問題，要求政府推行行政改革。我喺2019年提出議員議案，要求政府提升施政效率，加強跨政策局、跨部門嘅合作協調。部分人批評公務員「跳POINT」易，炒人難，都同我喺上屆立法會提出嘅幾項質詢一致。今年6月李梓敬議員動議嘅「改革公務員制度」議案，我亦有提出修訂，強調要改變公務員「按本子辦事」嘅文化。

政府係有聽到我同大家嘅意見，包括近年開始推展，我哋建測規園業界最關注嘅精簡發展審批流程。今屆政府再進一步，提出要完善特區治理體系，同改革公務員嘅管理制度。但唔少市民同業界，都覺得政府做得太少同太慢。所以我好支持林筱魯議員提出嘅「深化行政改革，堅持完善治理體系」議案，唔只要深化同堅持，仲需要加快。

原議案講到要避免部門同層級之間出現「權責不清」，呢個係架構同分工問題，當然需要優化，但仲唔夠嘅，因此我提出修訂，強調要解決埋部門「各自為政」嘅問題，針對嘅係公務員嘅處事心態。

我哋業界嘅一啲發展項目，部門權責睇落嚟係清晰，好似起樓嘅，批圖則係屋宇署，地契係地政署，規劃係規劃署，斜坡係土拓署，道路係路政署，交通及車位係運輸署，噪音係環保署，啲渠係渠務署，供水係水務署，電梯同供電管線係機電署，防火設施係消防處；如果涉及樹木，好似林議員講，就未必係樹木辦喎，要視乎棵樹生喺咩地方，由唔同嘅部門去管。分工係有，但唔一定能有效率咁處理申請。

一項發展，頭先講，閒閒哋涉及十多個部門，要業界花大量時間跑部門，而未能專注做好建築工程專業工作。只要其中一兩個部門嘅官員各自為政，推莊卸責，缺乏承擔，只係做監管者，唔願做促進者，業界就要花好多時間同資源，做多好多不必要嘅工作，香港嘅發展就會被拖慢。點解冇單一部門可以負責統籌協調呢？特區政府只有一個，一個部門推一個，解決唔到市民嘅問題，市民自然對整個政府都不滿。

以往政務司司長同財政司司長係負責有關統籌協調工作，但可能由於部門各自為政，互相卸責嘅事例太過多，做唔切，做得唔夠，於是就加人。今屆政府增設咗兩名副司長，專責做跨局、跨部門統籌。政務司副司長上一場就搞掃街同阻街，見到佢好努力，做到一啲成績。財政司副司長專責喺覓地建屋、發展建設方面做統籌，我知佢哋都好努力嘅，但市民同業界暫時未見到成績。

要杜絕部門各自為政，唔可以單靠幾位司長同副司長，每一個部門、每一個層級嘅官員都要變革。要有積極、主動嘅處事心態，先至做到習主席要求嘅「務實有為，破難而進，切實排解民生憂難」。本人謹此陳詞，支持原議案，同時希望議員支持我嘅修正案。