「維持教育開支佔本地生產總值的比例，提升教育質素」議案發言

主席，早喺上一屆立法會，我已指出隨着港人生育率下降，以及外來嘅年輕移民減少，香港嘅人口老化同勞動力不足將會持續加劇，促請政府正視。今年嘅施政報告提出「搶人才」，但喺鼓勵生育方面幾乎交白卷，我係感到失望。

對於今次議案關注嘅適齡學生人數減少嘅問題，我認為政府必須正視，及早同全盤咁去做好規劃同應對，包括點樣善用契機，去提升香港嘅教育質素同教師嘅專業水平，唔應該只關注教育開支佔本地生產總值嘅比例。

我最近喺唔同嘅會議，審議唔同嘅工務工程同開位建議時，我都特別強調政府要審慎理財，應使則使，否則特區嘅儲備好快就會使晒。主席，我明白學生減少，唔代表政府嘅教育開支、學校嘅使費、同教師嘅數目，亦一定可以按比例咁減少，但過去幾年嘅發展亦都證明，政府嘅開支多寡，同教育質素嘅高低，教師表現嘅好壞，亦未必係成正比嘅。喺財赤嚴重，市況唔好嘅時候，各行各業，各個部門，都更必需要諗下點樣利用有限嘅資源，做得更好同更有成效。

對於梁子穎議員嘅修正案，要求將未來5年嘅公營中小學教師數目都凍結，一個都不能少，就令人感到有關建議，係咪只想保障部分教師嘅利益，而唔係關心學生、家長、同埋納稅人嘅利益呢？

主席，對於教育界好擔心嘅縮班殺校危機，我認同小班教學、較高嘅師生比例係有其好處，但如果縮到每級太少班，每一班減到只有好少嘅學生，可能反而會影響教學同學生嘅群體生活。

有啲學校收生嚴重不足，除咗因為整體學生同跨境學童減少，會否係本身嘅教學質素、校風、或者校政出咗問題呢？好多好嘅學校，包括某啲官校同津校，近年收生時繼續係大排長龍。我認為政府同教育界應該尊重學生同家長嘅選擇，唔應該因為要扶持一啲質素一般或欠佳嘅學校，就一刀切要求啲做得好嘅學校都減收同縮班。應該尊重自由選擇，汰弱留強，先係符合學生、家長同納稅人嘅利益。

此外，原議案同修正案，都只集中講中小學，冇乜點講大專、大學教育。要有效應對香港嘅勞動力同人才不足嘅問題，同時確保公帑用得其所，發揮最大效益，政府亦應該善用大學撥款嘅話語權，要求各大學配合政府嘅政策同市場嘅需求，調整學額，包括增加我要求咗好耐嘅建測規園界大學學額。

對於原議案同修正案，要求政府加強嘅職專教育及生涯規劃，我係大力支持嘅。行行出狀元，唔係每個人都要讀大學，唔係個個都有興趣從事醫療、金融同創科行業。希望教育局喺運用資源嘅時候，要畀到學生更多選擇，讓唔同嘅年青人都可以發揮所長，為社會出一分力。主席，本人謹此陳詞。